Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 214 Hüküm no: 225 Orijinal metin no: [33b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Yani’nin kardeşinin terekesinden hakkını tahsil etmek üzre Paroş v. Yorgi’yi vekil tayin etmesi Müsveddede kalmakla bu mahalle kayd olundu. Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Muzil nâm karye sâkinlerinden Hristo v. Yani nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Paroş v. Yorgi nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip bundan akdem mürd olan li ebeveyn karındaşım Todori nâm zimmînin işbu gāib ani’l-meclis olan İsteryano v. İstolat nâm zimmîye kırk bin nakd-i fıddî-i Osmânî râyic fi’l-vakt akçe deyn-i şer‘iyyesi olup kable edâ’i’d-deyn karındaşım mezbûr Todori mürd olmağla hâlâ zimmetime edâsı lâzım gelmeğin ben dahi mürd-i mezbûrun terekesinden olup karye-i merkūmede vâki‘ bir tarafdan Papa Dimitri v. ( ) mülküne ve bir tarafdan Yakomi v. ( ) mülküne ve bir tarafdan İlnato nâm nasrâniye mülküne ve bir tarafdan tarîk-i âma müntehî ve mahdûd olan bir bâb fevkānî beyti müştemil mülk menzilini ve sâir cemm-i gafîr muhallefâtını bey‘ ve kabz-ı semene cânibimden vekîl ve menâbıma nâib nasb ve ta‘yîn eyledim dedikde mezbûr Paroş dahi minvâl-i muharrer üzre vekâlet-i merkūmeyi bi’l-muvâcehe kabûl ve hizmet-i vekâleti edâ ve îfâya müte‘ahhid olıcak mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min Muharremi’l-harâm li sene tis‘a ve ışrîn ve elf. Şuhûdü’l-hâl: Mustafa b. Mehmed, Mehmed Beşe b. Abdullah er-Râcil, Mustafa b. Ahmed, Ali b. Abdullah, Yakub b. Kurd, Yorgi v. Apostol, Yakomi [v.] Apostol, İskarlet v. Polimed, Yorgi v. Paroş, Apostol v. İstati ve gayruhüm mine’l-hâzırîn.