Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 217 Hüküm no: 230 Orijinal metin no: [34a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Göka v. Dimo’nun bazı emlâk ve hayvanlarını Lesbo bt. Pano’ya satması Vilâyet-i Rumeli’nde Filibe kazâsı sâkinlerinden Göka v. Dimo nâm zimmî meclis-i şer‘-i hatîr-i lâzımü’t-tevkīrde işbu râfi‘atü hâze’l-kitâb (…) yine vilâyet-i merkūmede Ergirikasrı kazâsına tâbi‘ Prakovida nâm karyeden (…) vekâleti hasm-ı şer‘î-i câhid mahzarında (…) sâbite olan Lesbo bt. Pano nâm nasrâniye tarafından husûs-ı âti’l-beyânı tasdîka vekîl olup merkūme Lesbo (...) Göka v. Pano nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip sâbıkan sâkin olduğum karye-i merkūme Prakovida’da vâki‘ bir tarafdan Kika v. ( ) mülküne ve bir tarafdan Dimo v. Kondi mülküne ve iki tarafdan tarîk-i âma müntehî ve mahdûd iki tahtânî beyti müştemil mülk menzilimi ve yine karye-i merkūme Prakovida’da hâlâ mevcûd olan yirmi re’s mülk-i mahzım ve hakk-ı sırfım olan koyunumu ve iki kıt‘a lede’l-ahâlî ma‘lûmü’l-hudûd mülk harman yerimi ve iki re’s kara sığır öküzü ve iki re’s kara sığır ineği ve sâir beynimizde ilm-i şer‘î birle ma‘lûm esâs-ı beytimi, cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin müvekkile-i mezbûre Lesbo’ya yirmi dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip sâlifü’l-beyân mebî‘leri mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ler müvekkile-i mezbûre Lesbo’nun mülk-i müşterâ-yı sarîhleridir keyfe mâ yeşâ ve hasbe mâ yürîd mutasarrıfe olsun dedikden sonra mâ hüve’l-vâki‘ bi’t-taleb ketb olundu. Şuhûdü’l-hâl: Mustafa b. Mehmed, Ali b. Abdullah, Mehmed b. Ahmed, Hasan b. Hüseyin, Perviz b. Abdullah, Yakub b. Kurd, Kika v. Zoto, Koço v. Kiro, Kiro v. Yani?, Tibus v. Dimo, İlya v. Yani, Yani v. Kara Vano, Vasil v. Göno ve gayruhüm mine’l-hâzırîn.