Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 217 Hüküm no: 229 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Silivri nahiyesine bağlı Fener köyünün fıçı resminden muaf olması Mahmiye-i Kostantıniyye -humiyet ani’l-âfât ve’l-beliyye-de Kiler-i âmire kethüdâsı olan fahrü’l-akrân Mehmed Ağa b. Abdüddâim nâm kimesne tarafından Hâslar kazâsında vâki‘ kasabât ve kurânın bağları mahsûlünden hâsıl olan hamrın kānûn üzre resm-i fıçıları cem‘ine ber vech-i iltizâm emîn olan Ahmed Bey b. ( ) el-Cündî ve Yasef el-Yahudi nâm kimesneler meclis-i şer‘-i hatîr-i lâzımü’t-tevkīrde yine kazâ-i mezbûr müzâfâtından nâhiye-i Silivri tevâbi‘inden Fener nâm karye ahâlîsi tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’l-mer‘î şer‘an sâbite olan fahrü’l-emâcid ve’l-ekârim Mustafa Ağa b. İlyas nâm kimesne mahzarında her biri ikrâr ve takrîr-i kelâm edip karye-i merkūme Vize sancağından olup Vize sancağı ise umûmen resm-i fıçıdan ma‘füv ve müsellem olmaları ile Dîvân-ı hümâyûn ve sa‘âdet-makrûn tarafından mürâfa‘a oldukda karye-i merkūme ahâlîsi dahi resm-i fıçıdan ma‘füv oldukları zâhir olmağın cânib-i saltanat-ı aliyye’den karye-i mezbûre ahâlîsi üzerine resm-i fıçı talebinden memnû‘ olduk min ba‘d karye-i merkūme ahâlîsinden resm-i fıçı da‘vâ ve taleb edersek lede’l-hükkâmi’l-kirâm istimâ‘ olunmaya dediklerinde mukırrân-ı mezbûrânın vech-i mübeyyen üzre cârî olan ikrâr ve takrîrlerin vekîl-i mûmâ-ileyh Mustafa Ağa bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Ahmed Ağa b. Mustafa Ser-bevvâbân-ı hâssa, Ali Bey b. Hüseyin el-Cündî Derviş b. Mehmed, İlyas Bey b. Derviş el-Cündî Süleyman b. Sinan el-Cündî Mustafa b. Mehmed, Süleyman b. Turgud, Ali b. Abdullah el-Cündî Yakub b. Kurd ve gayruhüm mine’l-hâzırîn.