Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 219 Hüküm no: 232 Orijinal metin no: [34b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Acem Mehmed b. Memi’nin menzilini Yani v. Dimitri’ye satması Vilâyet-i Rumeli’nde Mizistre kazâsına tâbi‘ Ponkani [Poniçani] nâm karye sâkinlerinden Mehmed b. Memi nâm acemî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yani v. Dimitri nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Dimitri v. ( ) mülküne ve bir tarafdan Anavalosti v. ( ) mülküne ve bir tarafdan İstemad v. ( ) mülküne ve bir tarafdan Yani v. ( ) mülküne müntehî ve mahdûd bir tahtânî beyti ve üstünde tahta-pûşu ve muhavvatayı müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Yani’ye dört yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Yani’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i muharrer üzre cârî olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-âşir min Cumâdelûlâ li târihi’l-mezbûr. Şuhûdü’l-hâl: Hasan Beşe b. Abdullah er-Râcil, Mehmed Beşe b. Abdullah er-Râcil, Mustafa Çelebi b. Ali Çukadâr, Mehmed Çelebi b. Ahmed, Ömer Bey b. Abdullah er-Râcil, Ahmed Beşe b. Abdullah er-Râcil, Hasan Beşe b. Abdullah er-Râcil, Mehmed Bey b. Abdullah er-Râcil.