Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 219 Hüküm no: 233 Orijinal metin no: [34b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Komyana’nun bazı emlâk ve ağaçlarını Sagoli v. Yani’ye satması Vilâyet-i Rumeli’nde Avlonya sancağında Poganiye kazâsına tâbi‘ Poliçeyi nâm karye sâkinlerinden Dimo v. Komyana nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Sagoli v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yani v. İstano mülküne ve bir tarafdan Manol v. İstati mülküne ve bir tarafdan Diyani v. Duka mülküne ve bir tarafdan nehre müntehî ve mahdûd dört bâb tahtânî beyti ve muhavvatayı müştemil mülk menzilden ve yine menzil-i mezbûra muttasıl tahmînen on iki çapalık mülk bağdan ve yine karye-i merkūme etrâfında vâki‘ seksen aded dut ağacından ve yine kazâ-i mezbûra tâbi‘ Küçük Rinekula nâm karye kurbunda vâki‘ Kurka Suyu demekle ma‘rûf su ile dâir üç göz bir bâb mülk değirmenden ve yine değirmen-i merkūm kurbunda vâki‘ bir göz kebe değirmeninden ve yine değirmen-i mersûm kurbunda bir bâb iki göz biri kebe ve biri buğday değirmeninden ve yine kazâ-i mezbûr tevâbi‘inden Tolvise nâm karye kurbunda inde’l-ahâlî ve’l-cîrân ma‘lûmü’l-hudûd bir göz su değirmeninden nısf hisse-i şâyi‘alarımı, cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin merkūm Sagoli’ye otuz beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûreleri mahallinde kabza müşterî-i merkūmu taslît eylediğimden sonra yine karye-i merkūme Poliçeyi kurbunda vâki‘ lede’l-ahâlî her biri ma‘lûmü’l-hudûd on beş kıt‘a tarlalardan ve yine karye-i merkūme Küçük Rinekula kurbunda vâki‘ on beş kıt‘a taht-ı tasarrufumda olup tahmînen diyârımızda Dağar ta‘bîr olunur şey ile cümlesi on beşer tohum istî‘âb eder cem‘an otuz kıt‘a tarlalardan nısf hisse-i şâyi‘alarımın hakk-ı tasarrufunu sâhib-i arz ma‘rifetiyle merkūm Sagoli’ye tefvîz edip ol dahi minvâl-i muharrer üzre tefevvüz ve kabûl kıldıkdan sonra mukābele-i tefvîzde olan on bin nakd-i mezbûrü’n-na‘t akçe merkūm Sagoli yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân emlâkden nısf hisse-i şâyi‘alarım merkūm Sagoli’nin mülk-i müşterâ-yı sarîhidir ve mârrü’z-zikr otuz kıt‘a tarlalardan dahi nısf hisse-i şâyi‘alarımın hakk-ı tasarrufları mersûmundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Sagoli bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Cemâziyelevvel li târihi’l-mezbûr. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, Perviz b. Abdullah, İstirato v. Mihal, Piro v. Kiryaso, Yani v. Yorgo, Sagoli v. Kiro, Sagoli v. Cani, Pano v. Niko, Yani v. Kini, Cuvaki v. Yorgo, Yani v. Cako, Sagoli v. Sorvani, Dimo v. Moro, Niko v. Mazo, Yani v. Niko, Kosta v. Çevako, Yani v. Köni, Minho v. Lazi, Yorgo v. Yuvad, Minho v. Kalinevali.