Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 221 Hüküm no: 235 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Alagöz’ün kızları Gevherhan, Şahhuban ve Fâtıma’nın müşterek menzillerini Eyüb Ağa b. Ali’ye satmaları Mahmiye-i Üsküdar kurbunda nefs-i Yoros kazâsı sâkinelerinden Gevherhan ve Şahhuban ve mahmiye-i Kostantıniyye mahallâtından Emir Bey mahallesi sâkinelerinden Fâtıma benât-ı Alagöz nâm hâtunlar meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb fahrü’l-akrân Eyüb Ağa b. Ali mahzarında her biri ikrâr ve takrîr-i kelâm edip medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Baba Haydar mahallesinde vâki‘ bir tarafdan müşterî-i mezbûr mülküne ve bir tarafdan Pervâne Hâce b. ( ) mülküne ve iki tarafdan tarîk-i âma müntehî ve mahdûd iki fevkānî beyti ve iki tahtânî beyti ve sundurmayı ve ıstabl ve bi’r-i mâyı ve kenîfi ve zât-ı eşcâr-ı müsmire ve gayr-ı müsmireyi hâvî hadîkayı müştemil olup işbu akdin sudûruna dek ale’l-iştirâki’s-seviy silk-i mülk-i sahîhimizde münselik ve münharıt olan mülk menzilimizi cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin müşârün-ileyh Eyüb Ağa’ya yirmi üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip meblağ-ı mezbûru merkūm Eyüb Ağa yedinden ale’l-iştirâk bi’t-tamâm ve’l-kemâl ahz ve kabz edip teslîm-i mebî‘ eyledik ba‘de’l-yevm sâlifü’l-beyân menzil-i merkūm Eyüb Ağa’nın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırrât-ı mezbûrâtın minvâl-i muharrer üzre cârî olan ikrâr ve takrîrlerini el-mukarru lehü’l-mezbûr Eyüb Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min Cumâdelâhire li târihi’l-mezbûr. Şuhûdü’l-hâl: Fahrü’l-hutebâ Hasan Efendi b. Ahmed el-Hatîb bi câmi‘-i Ayasofya-i Kebîr, Hâce Mehmed Efendi b. Hemdem el-İmâm, el-Hâc Bayram b. Şükrullah el-Hatîb, Ahmed Efendi el-Müderris eş-şehîr bi Bağdadî, Mehmed Çelebi b. Takiyyüddin el-Cündî İbrahim Çelebi b. Mehmed el-İmâm, Abdurrahman Halîfe b. Ömer el-İmâm, Ali Bey b. Abdullah, Kasım b. Sinan, Keyvan b. Abdullah, Receb b. Abdi, Mustafa b. Hasan, Mehmed b. İbrahim, Bekir Bey b. Pîrî, İbrahim Bey b. Veli er-Râcil, Ali Ağa b. Abdülmennân, Hüseyin b. Abdullah el-Müteferrika, İbrahim b. Abdullah el-Müteferrika, Ahmed b. Rıdvan el-Cündî ve gayruhüm mine’l-hâzırîn.