Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 222 Hüküm no: 236 Orijinal metin no: [35a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Aleksi’nin menzilini Yani v. Nikola’ya satması Vilâyet-i Rumeli’nde Mora sancağında Kalavrita kazâsına tâbi‘ Sopotoz nâm karye sâkinlerinden Panayot v. Aleksi nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Yani v. Nikola nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Panayot v. Yanakovili mülküne ve bir tarafdan Yani v. Dimo mülküne ve bir tarafdan Yani v. Kopteril mülküne ve bir tarafdan vâdiye müntehî ve mahdûd olup bir tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi ve muhavvatayı müştemil mülk menzilimi cümle-i tevâbi‘ ve levâhıkı ile mesfûr Yani’ye yedi bin beş yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen eylediğimden sonra mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd mezkûr Yani’nin mülk-i müşterâ-yı sarîhidir keyfe mâ yeşâ mutasarrıf olsun dedikde gıbbe’t-tasdîk mâ hüve’l-vâki‘ bi’t-taleb ketb olundu. Asl-ı meblağ-ı mezbûr dokuz bin beş yüz akçedir kayıdda sehv olunmuşdur binâen alâ zâlik derkenar olundu. Hurrire fi’l-yevmi’r-râbi‘ aşer min Cemâziyelâhir li sene tis‘a ve ışrîn ve elf. Şuhûdü’l-hâl: Mustafa Beşe b. Abdullah er-Râcil, Hüseyin Beşe b. Abdullah er-Râcil, Mustafa b. Mehmed, Ali b. Abdullah, Perviz b. Abdullah, Yakub b. Kurd, Todori v. Nikola, Yorgi [v.] Dimo, Nikola [v.] Andriye, Yani [v.] Dimo, İstati [v.] Petro, Pando [v.] Mihal, Kosta [v.] Todori, Minho [v.] Dimo, Todori v. Haci ve gayruhüm mine’l-hâzırîn.