Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 222 Hüküm no: 237 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Yorgi’nin Nikola v. Yorgi’ye bazı emlâkini satıp bazılarının da kullanım hakkını devretmesi Vilâyet-i Rumeli’nde İnebahtı sancağında Gerbeniş kazâsına tâbi‘ Pavluç nâm karye sâkinlerinden Mihal v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Nikola v. Yorgi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ bir tarafdan Nikola v. Makalya bağına ve bir tarafdan Ergiri v. Dimo bağına ve bir tarafdan Nikola v. ( ) bağına ve bir tarafdan Nikola v. Makalya çayırına müntehî tahmînen dört çapalık bir kıt‘a mülk bağımı ve yine karye-i merkūme kurbunda vâki‘ lede’l-ahâlî ma‘lûmü’l-hudûd tahmînen diyârımız keyli ile iki keyl tohum istî‘âb eder bir kıt‘a mülk yoncalığımı mezbûr Nikola’ya bi safkatin vâhidetin üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ân-ı mezkûrânı mahallinde kabza müşterî-i mezbûru taslît eylediğimden sonra yine karye-i merkūme sınırı dâhilinde vâki‘ tahmînen bir müd tohum istî‘âb eder taht-ı tasarrufumda olan üç kıt‘a tarlaların hakk-ı tasarrufunu sâhib-i arz ma‘rifetiyle merkūm Nikola’ya tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan bin nakd-i mezbûrü’n-na‘t akçeyi merkūm Nikola yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân bir kıt‘a bağ ve bir kıt‘a yoncalık merkūm Nikola’nın mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufları merkūmundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Nikola bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis li târihi’l-mezbûr. Şuhûdü’l-hâl: Mustafa b. Mehmed, Süleyman [b.] Turgud, Yakub b. Kurd, Perviz b. Abdullah, Nikola v. Yorgi, Pavlo v. Mihal, Kiriso v. Kosta, Doğrafo v. Yani, Marto v. Yorgi.