Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 225 Hüküm no: 241 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Beşe b. Abdullah’ın değirmen hissesini Nikola v. Yorgi’ye satması Vilâyet-i Rumeli’nde İnebahtı sancağında Gerbeniş kazâsına tâbi‘ Muzilo nâm karye sâkinlerinden fahrü’l-akrân Süleyman Beşe b. Abdullah nâm râcil meclis-i şer‘-i şerîfde işbu hâmil-i hâze’l-kitâb Nikola v. Yorgi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûre kurbunda Muzilderesi demekle ma‘rûf mevzi‘de vâki‘ etrâf-ı erba‘ası mezbûr Nikola tarlası ile mahdûd olup sakf-ı vâhid altında mezbûr Muzilderesi suyu ile dâir bir göz mülk değirmende olan nısf hisse-i şâyi‘amı merkūm Nikola’ya elli bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân hudûd ile mahdûd olan değirmenden nısf hisse-i şâyi‘amı mezbûr Nikola’nın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrinde el-mukarru lehü’l-merkūm Nikola vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu yed-i tâlibine def‘ olundu. Hurrire fi’t-târihi’l-mezbûr. Şuhûdü’l-hâl: Ahmed Beşe Odabaşı, Osman Bey el-Cündî Mehmed Beşe [b.] Abdullah er-Râcil, Ali Beşe er-Râcil.