Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 225 Hüküm no: 240 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeyneb Hâtun mahallesindeki menzilin Hamza b. Maden’e satılması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Zeyneb Hâtun mahallesi sâkinelerinden Zeynî Hâtun bt. Mustafa meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Hamza b. Maden nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mahalle-i merkūmede vâki‘ bir tarafdan Osman Dede zâviyesi’ne ve bir tarafdan Sâliha Hâtun vakfı’na ve bir tarafdan Hamza b. Ramazan mülküne ve bir tarafdan Nisâ Hâtun bt. Yusuf mülküne müntehî ve mahdûd bir fevkānî beyti ve sundurmayı ve kenîfi ve zât-ı eşcâr-ı müsmire ve gayr-ı müsmireyi hâvî hadîkayı müştemil olup işbu akdin sudûruna dek silk-i mülk-i sahîhimde münselik ve münharıt olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Hamza’ya iki bin beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm sâlifü’l-beyân menzil-i mahdûd-ı merkūm Hamza’nın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırra-i mezbûrenin minvâl-i muharrer üzre cârî olan ikrâr ve takrîrini el-mukarru lehü’l-mezbûr Hamza vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer li târihi’l-mezbûr. Şuhûdü’l-hâl: Mustafa b. ( ) el-İmâm, Hasan b. Sinan, Ahmed b. Hamza, Yusuf, Osman b. Behram, İsmail, Mehmed b. Mehmed el-Müezzin, Ali b. Hüseyin, İbrahim b. Mehmed, Mustafa b. Mehmed, Yakub b. Kurd.