Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 226 Hüküm no: 243 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zahide bt. İskender’in abacı dükkânını Hasan Çelebi b. Ali’ye satması Havâss-ı Sultâniyye kazâsı müzâfâtından nefs-i kasaba-i Silivri mahallâtından Alibey mahallesi sâkinelerinden Zahide Hâtun bt. İskender meclis-i şer‘-i hatîr-i lâzımü’t-tevkīrde işbu hâmilü’l-kitâb hâlâ pâdişâh-ı âlem-penâh hazretlerinin sarây-ı âmirelerinde kızlarağası olan olan mu‘temedü’l-mülûk ve’s-selâtîn celîsü’l-izzi ve’t-temkîn Mustafa Ağa b. Abdülmuîn hazretlerinin saraçbaşıları olan fahrü’l-emâcid ve’l-ekârim zübdedü’l-mefâhir ve’l-mekârim Hasan Çelebi b. Ali nâm kimesne tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında Ali b. Hasan ve Hızır b. Hasan şehâdetleri ile şer‘an sâbit ve mütehakkik olan Ramazan Efendi b. Halil nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip kasaba-i merkūme sûkunda iki tarafdan Nasuh Efendi mülküne ve tarafeyni tarîk-i âma müntehî ve mahdûd bir kıt‘a mülk abacı dükkânımı cümle-i tevâbi‘ ve levâhıkı ve kâffe-i menâfi‘ ve merâfıkı ile müvekkil-i mûmâ-ileyh Hasan Çelebi’ye altmış bin nakd-i fıddî-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân dükkân-ı mahdûd müvekkil-i mûmâ-ileyh Hasan Çelebi’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırra-i mezbûrenin vech-i mu‘ayyen üzre cârî olan ikrâr ve takrîrini vekîl-i mersûm Ramazan Efendi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-ışrîn min Cumâdelâhire li sene tis‘a ve ışrîn ba‘de’l-elf. Şuhûdü’l-hâl: Ali Çelebi b. Hüseyin el-Kâtib, Zülfikār Bey b. Abdullah el-Kâtib, Mehmed b. Hızır, Mehmed b. Mustafa, Abdüllatif b. el-Hâc Şaban, Mustafa b. Mehmed, Perviz b. Abdullah, Mustafa Çelebi b. Ali Çukadâr, Ali b. Abdullah ve gayruhüm mine’l-hâzırîn.