Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 227 Hüküm no: 244 Orijinal metin no: [36b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Yani’nin tarlalarının kullanım hakkını Yorgo v. Sermo’ya devretmesi Vilâyet-i Rumeli’nde Avlonya sancağında Ergirikasrı kazâsına tâbi‘ Vaniste nâm karye sâkinlerinden Nikola v. Yani nâm zimmî meclis-i şer‘de işbu hâmil-i hâze’l-kitâb Yorgo v. Sermo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme sınırı dâhilinde mevâzi‘-i müteferrikada vâki‘ her biri lede’l-ahâlî ve’l-cîrân ma‘lûmü’l-hudûd ve’l-mikdâr on iki kıt‘a mutasarrıf olduğum tarlaların içinde olan mahsûlâtı ile ma‘an hakk-ı tasarrufunu sâhib-i arz ma‘rifetiyle merkūm Yorgo’ya tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan beş bin nakd-i fıddî-i Osmânî râyic fi’l-vakt akçeyi merkūm Yorgo yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân on iki kıt‘a tarlaların hakk-ı tasarrufu merkūm Yorgo’nundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mâ hüve’l-vâki‘ bi’t-taleb ketb olundu. Hurrire fî evâsıtı Cumâdelâhire li târihi’l-mezbûr. Şuhûdü’l-hâl: Mustafa b. Mehmed, Yakub b. Kurd, Perviz b. Abdullah, Ali b. Abdullah, Yani v. Varko, Nika v. Papa, Hristo v. Sinyan?, Niko v. Dimo, Yorgo v. Yani, Hristo v. Dimo, Duka v. Pino.