Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 232 Hüküm no: 252 Orijinal metin no: [37b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Ahmed’in menzilini Receb b. Hızır ile Hasan b. Gazanfer’e satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Nişâncı Paşa mahallesi sâkinlerinden Meryem Hâtun bt. Ahmed meclis-i şer‘de işbu hâmil-i hâze’l-kitâb Receb b. Hızır ve Hasan b. Gazanfer nâm kimesneler mahzarlarında bi’t-tav‘ ikrâr edip mahalle-i mezbûrede vâki‘ bir tarafdan Kaya bt. Hasan ve Râziye bt. Yakub mülklerine ve iki tarafdan Receb b. Abdullah mülküne ve bir tarafdan tarîk-i hâssa müntehî beş bâb tahtânî beyti ve sundurmayı ve ıstabl ve çardağı ve odunluğu ve bi’r-i mâyı ve kenîfi ve zât-ı eşcâr-ı müsmire ve gayr-ı müsmireyi hâvî hadîkayı müştemil mülk menzilimi cümle-i tevâbi‘ ve levâhıkı ile bi safkatin vâhidetin mezbûrân Receb ve Hasan’a ale’l-iştirâki’s-seviy dokuz bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip mezbûrân yedlerinden meblağ-ı mezbûru ale’l-iştirâk ahz ve kabz edip teslîm-i mebî‘ eyledim ba‘de’l-yevm sâlifü’l-beyân menzil-i mahdûd mezbûrân Receb ve Hasan’ın mülk-i müşterâ-yı sarîhleridir keyfe mâ yeşâân ve hasbe mâ yürîdân mutasarrıf olsunlar dediklerinde mukırra-i mezbûrenin minvâl-i muharrer üzre cârî olan ikrârını el-mukarru lehümü’l-mezbûrân Receb ve Hasan vicâhen tasdîk edicek mâ hüve’l-vâki‘ [bi’t-taleb] ketb olundu. Hurrire fi’l-yevmi’s-sâdis [min Cumâdelâhire] li târihi’l-mezbûr. Şuhûdü’l-hâl: Mehmed b. Ahmed, Mehmed b. İvaz, Muharrem b. Hızır, Muharrem b. Evliyâ, Mehmed b. Hüseyin, Hızır b. Ali el-Müezzin, Şeyhî b. Mahmud, Ali Efendi b. Hayreddin el-İmâm, Ramazan b. Hüseyin, İvaz Dede b. Mehmed, Osman b. Abdülgaffar, Memi b. Hakkı.