Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 231 Hüküm no: 251 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. Abdullah’ın menzili ile ceviz ve kestane ağaçlarını Mehmed Efendi b. İbrahim’e satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından merhûm Baba Haydar mahallesi sükkânından Halil b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb fahrü’l-meşâyihi’l-kirâm Mehmed Efendi b. İbrahim nâm kimesne tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında Kurd b. Hüsrev ve Zülfikār Bey b. Şaban şehâdetleri ile şer‘an sâbite ve mütehakkika olan fahrü’l-eimmeti’l-kirâm Maden Efendi b. Bünyad nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip medîne-i merkūme tevâbi‘inden Alibey nâm karyede vâki‘ bir tarafdan Abbas Hâce mülküne ve bir tarafdan dağa ve bir tarafdan sahrâya ve bir tarafdan tarîk-i âma müntehî ve mahdûd bir tahtânî beyti ve bir ahırı ve bir odayı ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilimi ve mevâzi‘-i adîdede vâki‘ dört dip ceviz eşcârını ve bir dip kestane ağacını, cümle-i tevâbi‘ ve levâhıkı ve kâffe-i menâfi‘ ve merâfıkı ile müvekkil-i mûmâ-ileyh Mehmed Efendi’ye bi safkatin vâhidetin üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân mebî‘ler müvekkil-i mûmâ-ileyh Mehmed Efendi’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini vekîl-i mezbûr Maden Efendi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min Cumâdelâhire li târihi’l-mezbûr. Şuhûdü’l-hâl: Ahmed Ağa b. Durkail [Durak] el-Konevî, Ahmed Bey b. ( ) el-Cündî Hasan Dede b. Hızır, Ahmed Dede b. ( ), Hüdaverdi b. ( ) Kapısız, Mustafa b. Mehmed, Ali b. Abdullah, Süleyman b. Turgud, Yakub b. Kurd, Perviz b. Abdullah ve gayruhüm.