Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 179 Hüküm no: 146 Orijinal metin no: [19a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Çelebi b. İbrahim’in, Mehmed b. Ahmed, Mehmed b. Ramazan ve Ebûbekir b. Nuh ile kavga davasında sulh yolu ile anlaştıkları Mahmiye-i İstanbul’da Yenibahçe kurbunda Sinan Paşa mahallesi sükkânından bâ‘isü’l-kitâb Ömer Çelebi b. İbrahim nâm şâbb-ı emred meclis-i şer‘-i şerîfde, dergâh-ı âlî gulâm-ı acemiyânından yirmi altıncı cemâ‘ata mahsûs oda yoldaşlarından Mehmed b. Ahmed ve diğer Mehmed b. Ramazan ve Ebûbekir b. Nuh nâm kimesneler ile zikr olunan oda yoldaşlarından gāib ani’l-meclis Ahmed b. Mehmed nâm kimesne tarafından husûs-ı âti’l-beyâna vekîl olduğu mezbûrân Mehmed ve Ebûbekir şehâdetleri ile şer‘an sâbit olan çorbacı Mehmed Ağa b. Ahmed nâm kimesne mahzarlarında ikrâr ve takrîr-i kelâm [edip] mezbûrûn Mehmed ve diğer Mehmed ve Ebûbekir ile müvekkil-i mezbûr Ahmed târih-i kitâbdan iki ay mukaddem zikr olunan Yenibahçe kurbunda vakt-i işâda el satırı ile her birimizi darb ve cerh etmiş idin deyû benden da‘vâ eylediklerinde ben dahi ba‘de’l-inkâr mezbûrlardan başıma ve burnuma değnek ile vurup darb [ve] cerh eylemeleri ile ben dahi mûcebini mezbûrlardan da‘vâ ettiğimde ba‘de’n-nizâ‘ muslihûn tavassut edip mezbûrların da‘vâsı için ben mezbûr Mehmed b. Ahmed’e dört esedî guruş ve mezbûr diğer Mehmed b. Ramazan’a on iki esedî guruş ve mezbûr Ebûbekir ile müvekkil-i mezbûrdan her birine ikişer esedî guruş vermek üzre mezbûrlar ile beynimizde inşâ-i akd-i sulh ettiklerinde mezbûrûn Mehmed ve diğer Mehmed ve Ebûbekir’den her biri asâleten ve merkūm Mehmed Ağa vekâleten sulh-i mezbûru kabûl ve her biri zikr olunan bedel-i sulhü yedimden ahz u kabz ettiklerinden sonra mezbûr Mehmed ve diğer Mehmed ve Ebûbekir asâleten ve merkūm Mehmed Ağa vekâleten husûs-ı merkūma müte‘allika âmme-i de‘âvîden zimmetimi ibrâ-i âmm-ı kātı‘ü’n-nizâ‘ ile ibrâ etmişlerdir dedikde, mezbûr Mehmed ve diğer Mehmed ve Ebûbekir ile vekîl-i mezbûr Mehmed Ağa kaziyye minvâl-i muharrer üzre olup vech-i muharrer üzre mezbûrûn Mehmed ve diğer Mehmed ve Ebûbekir’den her biri asâleten ve merkūm Mehmed Ağa vekâleten vech-i meşrûh üzre mezbûr Ömer ile bedel-i mezbûra sulh ve her biri bedel-i sulhü alıp kabz edip husûs-ı mezbûra müte‘allika âmme-i de‘âvîden mezbûr Ömer’in zimmetini ibrâ-i âmm-ı kātı‘ü’n-nizâ‘ ile ibrâ ettiklerini bi tav‘ihim ikrâr etmeğin mâ vaka‘a bi’t-taleb ketb olundu. Fî selhi şehri Rebî‘ulâhir sene [10]77. Şuhûdü’l-hâl: Mehmed Ağa b. el-Hâc Musa, Abdullah Efendi el-İmâm, Ahmed Halîfe el-Müezzin, Ahmed Çelebi b. el-Hâc Musa, İbrahim Beşe b. Mehmed el-Mübâşir, Ali b. Mustafa, Mehmed b. Ali, Veli Çelebi b. Fazlullah, Hüseyin b. Mahmud, Halil b. Mehmed, Eyüb b. Mustafa, Ahmed Çelebi b. Ali, Ahmed b. Mehmed, Mehmed b. İsmail.