Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 233 Hüküm no: 254 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Yani’nin ev ve birkaç hayvanını kardeşi Franko’ya satması Vilâyet-i Rumeli’nde İnebahtı sancağında nefs-i kazâ-i Gerbeniş sâkinlerinden Dimo v. Yani nâm zimmî meclis-i şer‘-i şerîfde li ebeveyn karındaşı işbu râfi‘ü hâze’l-kitâb Franko v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip kasaba-i mezbûrede vâki‘ bir tarafdan Yorgo v. Madleş mülküne ve bir tarafdan Şiro v. Hoka mülküne ve bir tarafdan Şervilo v. Martin mülküne ve bir tarafdan Dimo v. Şilo mülküne müntehî olup bir tahtânî beyti ve içinde iki kara sığır öküzünü ve yirmi re’s keçi ve bostan yerimi cümle-i tevâbi‘ ve levâhıkı ve kâffe-i menâfi‘ ve merâfıkı ile karındaşım mezbûr Franko’ya bi safkatin vâhidetin bin iki yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ât-ı mezkûrât merkūm Franko’nun mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Franko vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min şehri Cumâdelâhire li sene tis‘a ve ışrîn ve elf. Şuhûdü’l-hâl: Franko v. Yani, Yani v. Anastas, Minho v. Malaveş, Niko v. Marol, Yorgo v. Niyoni.