Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 234 Hüküm no: 255 Orijinal metin no: [38a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küçükhalkalı köyündeki binası ve cemaati kalmayan kilise arsasının Kemankeş Mahmud Paşa’ya satılması Kemânkeş demekle şehîr sâhibü’l-iz ve’l-ihtişâm hazret-i Mahmud Paşa -yesserallâhu mâ yeşâ- hazretlerinin taraf-ı âlîlerinden husûs-ı âti’l-beyâna vekîl-i şer‘îleri olup vekâleti bimâ hüve nehci’l-mu‘teberi’l-mer‘î şer‘an sâbite olan fahrü’l-akrân Abdi Ağa b. Abdülmennân meclis-i şer‘-i hatîr-i lâzımü’t-tevkīrde sevk-i kelâm edip Havâss-ı Aliyye kazâsı müzâfâtından Küçükhalkalı nâm karye[de] vâki‘ kilise harâbe müşrif olup eser-i binâdan bir şey kalmayıp bi’l-külliyye münhedim olduğundan mâ‘adâ karye-i merkūme keferesi dahi her biri celây-ı vatan ettikleri ecilden kilise-i merkūmenin arsası cânib-i beytülmâle âid ve râci‘ olmağın Havâss-ı Aliyye kazâsına bi’l-fi‘l beytülmâl-ı hâssa emîni olan Pîrî Bey b. Abdülmennân nâm kimesne sâlifü’z-zikr kilise yerini müvekkilim müşârün-ileyh hazretlerine bin nakd-i fıddî-i Osmânî râyic fi’l-vakt akçe resm-i tapusun alıp tasarrufu için yedine işbu semân ve ışrîn ve elf Ramazân-ı şerîfi’nin gurresi târihli müverrah hat ve hatmini müştemil tezkire vermişdir nazar olunup mûcebince cânib-i şer‘den dahi temessük verilmesi müvekkilim paşa-yı müşârün-ileyh hazretlerinin murâd-ı şerîfleridir dedikde vekîl-i mûmâ-ileyh Abdi Bey’in ibrâz eylediği mezbûr Pîrî Bey’in hat ve hatmini müştemil tezkireye nazar olundukda tamâm-ı mazmûn-ı tezkire vekîl-i mûmâ-ileyhin takrîrine muvâfık ve mutâbık bulunmağın cânib-i şer‘den dahi işbu hurûf ber sebîli’t-temessük ketb olunup yed-i tâlibe def‘ ve vaz‘ olundu. Hurrire fi’l-yevmi’l-ışrîn min Cumâdelâhire li sene tis‘a ve ışrîn ba‘de’l-elf. Şuhûdü’l-hâl: Cafer Ağa ez-Zevvâku’s-sultânî, el-Hâc Pervâne et-Tabbâh, Yahya b. ( ) el-Câbî, Rıdvan b. ( ) el-Korucu, Halil Kethüdâ-yı çiftlik, Hasan el-Bevvâbü’s-sultânî, Osman b. Abdullah.