Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 235 Hüküm no: 257 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mehmed’in Hüseyin b. Mustafa ve Hüsnü b. Müstecab’a iftira ettiğini kabul etmesi Mustafa b. Mehmed nâm kimesne meclis-i şer‘-i hatîr-i lâzımü’t-tevkīrde Hüseyin b. Mustafa ve Hüsnü b. Müstecâb nâm kimesneler mahzarlarında bi’t-tav‘ ve’r-rızâ ikrâr ve takrîr-i kelâm edip bundan akdem medîne-i Ebâ Eyyûb-i Ensârî -râdiye anhu Rabbühü’l-Bârî- sûkunda Allahverdi nâm bakkalın dükkânı açılıp, içinde ba‘zı eşyâsı sirkat olundukdan sonra ba‘de mürûri’z-zamân mezbûr Allahverdi dükkândan sirkat olunan eşyâyı benden mazannemdir deyû da‘vâ ve taleb etmekle ben dahi ba‘de’l-i‘tirâf, şerîklerin kimdir deyû meclis-i şer‘de suâl olundukda mezbûr Allahverdi’nin hakkını vermede bana mu‘âvin olalar deyû mezbûrân Hüseyin ve Hüsnü zikr olunan dükkânı açdığımda benimle bile açdılar, şerîklerimdir deyû ma‘a hâzâ husûs-ı mezbûrda mezbûrânın min ba‘d medhal ve alâkaları yoğiken isnâd ve iftirâ eylemişdim el-hâletü hâzihî husûs-ı mezbûrda mezbûrânın medhal ve alâkaları yokdur merkūm Allahverdi’nin dükkânını ben açdım dedikde mâ hüve’l-vâki‘ hıfzan li’l-makāl ketb olundu. Hurrire fi’l-yevmi’l-hâdî ve’l-ışrîn li târihi’l-mezbûr. Şuhûdü’l-hâl: Ali Efendi b. Mehmed el-Müsta‘id, Abdülfettâh Efendi b. Ali el-Müsta‘id, Mustafa b. Mehmed, Ali b. Abdullah, Perviz b. Abdullah, Mehmed b. Ahmed, Ali b. Mehmed, Yakub b. Kurd ve gayruhüm.