Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 235 Hüküm no: 258 Orijinal metin no: [38b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Dimo’nun bahçesini Kiro v. Niko’ya satması Vilâyet-i Rumeli’nde Büyük Delvine kazâsına tâbi‘ Hotasa nâm karyeden Yorgi v. Dimo nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Kiro v. Niko nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ iki tarafdan tarîk-i âma ve bir tarafdan Kirko v. Anastaş tarlasına ve bir tarafdan Diyamo v. ( ) tarlasına müntehî ve mahdûd tahmînen iki dönüm mikdârı zât-ı eşcâr-ı müsmire ve gayr-ı müsmireyi hâvî bir kıt‘a mülk bahçemi cümle-i tevâbi‘iyle mezbûr Kiro’ya bin dokuz yüz nakd-i fıddî-i Osmânî râyic fi’l-vakt akçeye bâtten bey‘ edip ve kabz-ı semen eylediğimden sonra mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’t-târih bahçe-i mezkûr Kiro’nun mülk-i müşterâ-yı sarîhidir keyfe mâ yeşâ mutasarrıf olsun dedikden sonra mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâmin aşer min Cumâdelâhire li seneti’l-merkūme. Şuhûdü’l-hâl: Mustafa b. Mehmed, Ali b. Abdullah, Kiro v. Tamo, İstamo v. Kosta, Yani v. İstati, Dimo v. Yani ve gayruhüm.