Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 244 Hüküm no: 271 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mehmed’in menzilini İbrahim Beşe b. Abdullah’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Aşçıbaşı mahallesi sâkinelerinden Sâliha Hâtun bt. Mehmed nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb İbrahim Beşe b. Abdullah nâm râcil mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Mehmed Beşe b. Hüseyin mülküne ve bir tarafdan tarîk-i âma ve iki tarafdan tarîk-i hâssa müntehî ve mahdûd iki tahtânî beyti ve sundurmayı ve sofayı ve bi’r-i mâyı ve zât-ı eşcâr-ı müsmire ve gayr-ı müsmireyi hâvî hadîkaya müştemil olup işbu akdin sudûruna dek silk-i mülk-i sahîhimde münselik olan mülk menzilimi cümle-i tevâbi‘ ve levâhıkı ile mezbûr İbrahim Beşe’ye sekiz bin yüz nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûd merkūm İbrahim Beşe’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırra-i mezbûrenin minvâl-i meşrûh üzre cârî olan ikrâr ve takrîrini el-mukarru lehü’l-mezbûr İbrahim Beşe vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Recebi’l-ferd li târihi’l-mezbûr. Şuhûdü’l-hâl: el-Hâc Turgud b. Durak el-Müezzin, Abdullah Efendi b. Maden el-İmâm, Mehmed Beşe b. Hüseyin er-Râcil, Hasan b. Alemşah, Mehmed b. Hasan, Ali b. Muharrem el-Mücellid, Mahmud b. Abdullah, Mustafa b. Mehmed, Perviz b. Abdullah ve Bâli ve gayruhüm mine’l-hâzırîn.