Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 243 Hüküm no: 270 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın menzilini Yani v. Nikola’ya satması Vilâyet-i Rumeli’nden Avlonya sancağında Arnavud Belgradı kazâsına tâbi‘ Sekite nâm karye sâkinlerinden Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Yani v. Nikola nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yani mülküne ve bir tarafdan Mitre [v.] Mitre mülküne ve bir tarafdan Koçi v. Metise mülküne ve bir tarafdan Vasobite mülküne müntehî bir tahtânî beyti ve zât-ı eşcâr-ı müsmire ve gayr-ı müsmireyi hâvî hadîkayı müştemil olan mülk menzilimi cümle-i tevâbi‘ ve levâhıkı ile mezbûr Yani’ye dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Yani’nin mülk-i müşterâ-yı sarîhidir keyfe mâ yeşâ mutasarrıf olsun dedikde mukırr-ı mezbûrun ikrâr ve takrîrin el-mukarru lehü’l-mezbûr Yani vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Recebi’l-ferd li târihi’l-mezbûr. Şuhûdü’l-hâl: Ömer Beş b. Abdullah er-Râcil, Mehmed Beşe b. Abdullah er-Râcil, Timur Beşe b. Abdullah er-Râcil, Sinan b. Abdullah, Mustafa b. Mehmed, Ali b. Abdullah, Perviz b. Abdullah ve gayruhüm.