Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 245 Hüküm no: 273 Orijinal metin no: [40b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Evranos’un menzilini kızı Sâliha’ya satması Vilâyet-i Rumeli’nde Mora sancağında Kalavrita kazâsına tâbi‘ İstrazeva nâm karye sâkinlerinden Ahmed b. Evranos nâm kimesne meclis-i şer‘-i hatîr-i lâzımü’t-tevkīrde yine mezbûr Ahmed’in sulbiye kızı olup karye-i merkūme sâkinelerinden olan işbu hâmiletü’l-kitâb Sâliha nâm hâtun tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’l-mer‘î şer‘an sâbite ve mütehakkika olan Derviş b. Abdülkerim mahzarında bi’t-tav‘ ve’r-rızâ ikrâr ve takrîr-i kelâm edip ve yine karye-i merkūmede vâki‘ bir tarafdan Hasan Beşe b. ( ) nâm râcil mülküne ve bir tarafdan Sinan b. Evranos mülküne ve bir tarafdan bostana ve bir tarafdan dağa müntehî ve mahdûd bir tahtânî beyti ve anbarı müştemil mülk menzilimi cümle ve yine karye-i merkūmede (…) tevâbi‘ ve levâhıkı ile müvekkile-i mezbûre Sâliha’ya bi safkatin vâhidetin beş bin nakd-i fıddî râyic fi’l-vakt akçeye bâtten bey‘ edip kabz-ı semen eylediğimden sonra mebî‘ât-ı mezkûreyi mahallinde kabza [mezbûre] Sâliha’yı taslît eylediğimden sonra yine karye-i mezbûre kurbunda mevâzi‘-i müte‘addidede vâki‘ on kıt‘a tarlanın hisse-i şâyi‘lerinin hakk-ı tasarruflarını sâhib-i arz ma‘rifetiyle müvekkile-i mezbûre Sâliha’ya tefvîz edip ol dahi (...) üzre tefevvüz ve kabûl ettikden sonra mukābele-i tefvîzde olan beş bin nakd-i fıddî-i Osmânî râyic [fi’l-vakt akçeyi] vekîl-i mezbûr Derviş yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân (...) müvekkile-i mezbûre Sâliha’nın mülk-i müşterâ-yı sarîhidir ve mârrü’z-zikr on kıt‘a tarlanın dahi [hakk-ı tasarrufu] müvekkile-i mezkûrenindir sâir emsâli tasarrufu gibi keyfe mâ yeşâ ve haysü mâ yürîd mutasarrıfe olsun [dedikde] mukırr-ı mezbûrun vech-i mübeyyen üzre cârî olan ikrâr ve takrîrini vekîl-i mersûm Derviş vicâhen tasdîk ve şifâhen tahkīk edicek mâ hüve’l-vâki‘ bi’t-ta[leb ketb] olundu. Hurrire fî selhi Cumâdelâhire li sene tis‘a ve ışrîn ve elf. Şuhûdü’l-hâl: Ali Beşe b. Mustafa er-Râcil, Mehmed Beşe b. Hızır er-Râcil, Derviş b. Selim er-Râcil, (...) b. Abdullah, Mustafa b. Derviş, Mustafa b. Abdullah ve gayruhüm.