Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 245 Hüküm no: 274 Orijinal metin no: [41a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın çiftlik ve bağları satın alması Odabaşı Mehmed Beşe’nin çiftlik hüccetidir. Havâss-ı Aliyye kazâsı müzâfâtından Büyükçekmece nâhiyesine tâbi‘ Akçaburgaz nâm karye sâkinelerinden Aleksandra bt. Dimitri nâm nasrâniye meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb [odabaşı] Mehmed Beşe b. Abdullah Râcil mahzarında bi’t-tav‘ ve’r-rızâ ikrâr ve takrîr-i kelâm [edip] karye-i mezbûrede vâki‘ bir tarafdan İbrahim b. Hüseyin mülküne ve bir tarafdan Yose v. Levend [mülküne] ve bir tarafdan Andriye v. Kurd mülküne ve bir tarafdan tarîk-i âma müntehî üç çatma beyti ve bir ahırı müştemil çiftlik demekle ma‘rûf mülk menzilimi ve yine karye-i mezbûre sınırında vâki‘ bir tarafdan Bostancıoğlu bağına ve bir tarafdan Muslihiddin Ağa bağına ve bir tarafdan Bostan v. Andriye bağına ve bir tarafdan tarîk-i âma müntehî lede’l-ahâlî ma‘lûmü’l-hudûd tahmînen on dönüm üç kıt‘a mülk bağlarımı cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mûmâ-ileyh Mehmed Beşe’ye yirmi beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ kıldım ba‘de’l-yevm sâlifü’l-beyân mebî‘ât müşârün-ileyh Mehmed Beşe’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırra-i mezbûrenin minvâl-i muharrer üzre cârî olan ikrâr ve takrîrin el-mukarru lehü’l-merkūm Mehmed Beşe vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî ve’l-ışrîn min Cumâdelâhire li sene tis‘a ve ışrîn ve elf. Şuhûdü’l-hâl: Mehmed Beşe b. Ali er-Râcil, Receb Beşe b. Karagöz er-Râcil, İbrahim Beşe b. Abdullah er-Râcil, Hüseyin b. Mustafa, Mustafa b. Mehmed, Yakub b. Kurd, Abdullah b. ( ) er-Râcil, Ali b. Abdullah.