Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 249 Hüküm no: 278 Orijinal metin no: [41b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Efendi Vakfı’na ait ahırın Receb b. Süleyman’a satılması Medîne-i Ebâ Eyyûb-i Ensârî -râdiye anhu Rabbühü’l-Bârî-’de vâki‘ merhûm Mahmud Efendi vakfı’na bi’l-fi‘l mütevellî olan fahrü’l-eimme Yusuf Halîfe b. Mustafa nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Receb b. Süleyman nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip sâbıkan vakf-ı merkūme mütevellî olan Sefer Halîfe b. Mehmed nâm kimesne Emir Buharî mahallesinde sâkin Kefevîzâde demekle şehîr Mehmed Efendi b. Mustafa’ya vakf-ı mezbûrdan bi tarîki’l-karzi’ş-şer‘î on beş bin nakd-i fıddî-i Osmânî râyic fi’l-vakt akçe verip ol dahi meblağ-ı mezbûrun edâsına kādir olmamağla mahalle-i merkūmede vâki‘ bir tarafdan Fahri Hâtun vakfı’na ve bir tarafdan mezbûr Yusuf Halîfe vakfı’na ve bir tarafdan taşçı Ramazan mülküne ve bir tarafdan tarîk-i âma müntehî bir kıt‘a mülk ahırını cümle-i tevâbi‘i mütevellî-i sâbık Sefer Halîfe’ye on bin nakd-i fıddî-i Osmânî râyic fi’l-vakt akçeye bâtten bey‘ edip teslîm-i mebî‘ eylediğinden sonra ol dahi vech-i meşrûh üzre iştirâ ve teslîm-i mebî‘ ettikden sonra yine meblağ-ı mezbûr on bin akçeyi vakf-ı mezbûra olan on beş bin akçenin on bin akçesiyle takās eylemişdi hâlâ ben dahi tevliyyet-i mahkiyem hasebiyle zikr olunan ahırı vakf-ı mezbûr için mezbûr Receb’e on üç bin nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân ahır-ı mezbûr Receb’in mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mâ hüve’l-vâki‘ gıbbe’t-taleb ketb olundu. Şuhûdü’l-hâl: eş-Şeyh Pîrî Efendi b. Yusuf, Abdi Çelebi b. Bedreddin, el-Hâc Muharrem b. Mehmed, Murtaza b. Mehmed, Mehmed Halîfe b. Ramazan, İvaz Halîfe b. Hüseyin, Mustafa b. Yusuf, Mustafa b. Abdullah er-Râcil, Mustafa b. Mehmed, Ali b. Abdullah ve gayruhüm.