Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 248 Hüküm no: 277 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Keyvan b. Abdullah’ın menzilini Mustafa b. Mehmed’e satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Süleyman Subaşı mahallesi sâkinlerinden Keyvan b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mustafa b. Mehmed nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Belkıs Hâtun bt. Abdullah mülküne ve bir tarafdan Mihri Hâtun bt. Abdullah mülküne ve bir tarafdan Süleyman Kethüdâ mülküne ve bir tarafdan tarîk-i âma müntehî bir tahtânî beyti ve sundurmayı ve sofayı ve kenîfi ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan mülk menzilimi cümle-i tevâbi‘ ve levâhıkı ile merkūm Mustafa’ya beş bin elli nakd-i fıddî akçeye bâtten bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûd merkūm Mustafa’nın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun ikrârını el-mukarru lehü’l-mezbûr Mustafa vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî 18 [min Cumâdelâhire] li târihi[’l-mezbûr]. Şuhûdü’l-hâl: Sinan Halîfe b. Cafer el-İmâm, Abdülmümin Halîfe b. Mehmed el-Müezzin, el-Hâc Mehmed Beşe b. Abdullah er-Râcil, Mustafa Beşe b. Abdullah er-Râcil, Musa Beşe b. Abdullah er-Râcil, Hasan b. Sinan, Hasan b. Hüseyin, Halil b. Hasan, Ali b. Abdullah, Perviz b. Abdullah, Yusuf b. Abdullah.