Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 251 Hüküm no: 282 Orijinal metin no: [42a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Nikola’nın harap yurt yerini Dimitri v. İstenaki’ye satması Vilâyet-i Rumeli’nde İnebahtı sancağında Yenişehir kazâsı müzâfâtından Kûhistan nâhiyesine tâbi‘ Büyük Kerasova nâm karye sâkinlerinden Mihal v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Dimitri v. İstenaki nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan müşterî-i mezbûr mülküne ve bir tarafdan yine benim mülküme ve bir tarafdan Todoro v. İstemad mülküne ve bir tarafdan tarîk-i âma müntehî ve mahdûd zât-ı eşcâr-ı müsmire ve gayr-ı müsmireyi hâvî bir kıt‘a mülk harâbe yurd yerimi cümle-i tevâbi‘ ve levâhıkı ile mezbûr Dimitri’ye üç bin akçeye bâtten bey‘ ve kabz-ı semen edip mebî‘-i mahdûdu mahallinde kabza müşterî-i merkūmu taslît eyledim ba‘de’l-yevm sâlifü’l-beyân harâbe yurd yeri merkūm Dimitri’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Dimitri vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-ışrîn [min Cumâdelâhire] li târihi[’l-mezbûr] Şuhûdü’l-hâl: Yorgi v. Mihal, Nikola v. İstemad, Mihal v. İstemad, İsteryano v. Dimitri, Şino v. Nikola, Anastas v. Nikola, İskirar? v. Yani, Todori v. Dimitri, Dimitri v. Moskola, Angilaki v. Papa, Mihal v. Dimitri, Nikola v. Papa, Dimitri v. Nikola, Dimitri v. Todoro ve gayruhüm.