Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 251 Hüküm no: 283 Orijinal metin no: [42a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yunus Beşe b. Abdullah’ın Mustafa Halîfe b. Ali’de cariye bedelinden alacağı olması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Düğmeci mahallesi sâkinlerinden Yunus Beşe b. Abdullah nâm râcil meclis-i şer‘-i hatîr-i lâzımü’t-tevkīrde Mustafa Halîfe b. Ali nâm kimesneyi ihzâr ve üzerine takrîr-i da‘vâ edip bundan akdem işbu gāibe ani’l-meclis olan Şâkire bt. Abdullah nâm bir Rûsiyyetü’l-asl câriyeyi mezbûr Mustafa Halîfe’ye on iki bin akçeye bey‘ edip ol dahi minvâl-i muharrer üzre iştirâ ve kabûl ettikden sonra meblağ-ı mezbûr on iki bin akçeden iki bin yüz akçesin hîn-i bey‘de merkūm Mustafa Halîfe yedinden alıp meblağ-ı bâkī olan dokuz bin dokuz yüz akçe merkūm Mustafa Halîfe zimmetinde bâkī kalmışdı hâlâ meblağ-ı bâkīyi vermede ta‘allül eder husûs-ı mezbûrdan suâl olunup [bi] hasebi’ş-şer‘i’ş-şerîf hakkım tahlîs olunmak matlûbumdur dedikde gıbbe’s-suâl mezbûr Mustafa Halîfe husûs-ı mezbûr minvâl-i muharrer üzre olduğunu bi’l-külliyye inkâr edicek müdde‘î-i mezbûrdan sıdk-ı kelâmını mübeyyine beyyine taleb olundukda udûl-i müslimînden Yusuf b. Abdullah ve diğer Yusuf b. Abdullah nâm kimesneler li ecli’ş-şehâde meclis-i şer‘a hâzırân olup fi’l-hakīka bundan akdem merkūm Yunus Beşe câriye-i merkūmeyi merkūm Mustafa Halîfe’ye on iki bin akçeye bey‘ eyledi. Husûs-ı merkūma minvâl-i muharrer üzre olduğuna şâhidleriz şehâdet dahi ederiz deyû edâ-i şehâdet-i şer‘iyye ettiklerinde mezbûrânın şehâdetleri ba‘de’t-ta‘dîl ve’t-tezkiyye hayyiz-i kabûlde ve mahall-i irtizâda mürâfa‘a oldukdan sonra mâ hüve’l-vâki‘ bi’t-taleb ketb [olundu]. Hurrire fi’l-yevmi’r-râbi‘ [min Cumâdelâhire] li târihi’l-mezbûr. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, Yusuf b. Abdullah, Perviz b. Abdullah ve gayruhüm.