Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 254 Hüküm no: 286 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Keto v. Marako’nun menzilini Duka v. Kiro’ya satması Vilâyet-i Rumeli’nde Avlonya sancağında Poganiye kazâsına tâbi‘ Mesarye nâm karye sâkinlerinden Keto v. Marako nâm zimmî meclis-i şer‘-i mutahharda işbu hâmil-i hâze’l-kitâb Duka v. Kiro nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Seryo v. ( ) mülküne ve bir tarafdan İris v. Nika mülküne ve bir tarafdan Apostol v. Vagorci mülküne ve bir tarafdan mezbûr Apostol bahçesine müntehî iki fevkānî ve iki tahtânî beyti müştemil mülk menzilimi cümle-i tevâbi‘ ve levâhıkı ile mezbûr Duka’ya on üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân hudûd ile mahdûd olan menzil-i merkūm Duka’nın mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Duka vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olunup yed-i tâlibine def‘ olundu. Hurrire fi’l-yevmi’r-râbi‘ aşer min Cumâdelâhire li sene tis‘a ve ışrîn ba‘de’l-elf. Şuhûdü’l-hâl: Dimo v. ( ), Dimo v. Yorgo, Yorgo v. Kiko, Yani v. Nika, Kosta v. ( ).