Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 253 Hüküm no: 285 Orijinal metin no: [42b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mirialem Mustafa Ağa’nın kızları Fâtıma ve Rukiye’nin çiftliklerini Sefer Ağa b. Abdullah’a satıp bazı mülklerinin de kullanım hakkını devretmeleri Dârü’s-saltanati’s-seniyye Kostantıniyye el-mahmiyye -suniyet ani’l-âfât ve’l-beliyye-de vâki‘ cennet-mekân firdevs-âşiyân merhûm ve mağfûrun-leh Sultan Bayezid Hân -aleyhi’r-rahmetü ve’r-rıdvân- kurbunda sâkine olup sâbıkan mîrialem olan merhûm Mustafa Ağa b. Abdullah kerîmeleri fahrü’l-muhadderât zahrü’l-muvakkarât safiyyetü’z-zât melekiyyetü’s-sıfât Fâtıma ve Rukiye nâm hanımlar taraflarından husûs-ı âti’l-beyân üzre vekîl olup vekâleti hasm-ı şer‘î-i câhid mahzarında müvekkiletân-ı merkūmetân hanımlar ma‘rifet-i şer‘iyye ile ârifân olan Ahmed Bey b. Abdullah el-Kâtib ve Mahmud Bey b. Abdullah nâm alemdâr şehâdetleri ile şer‘an sâbite ve mütehakkika fahrü’l-emâcid ve’l-ekârim zübdetü’l-mefâhir ve’l-mekârim Mustafa Bey b. eş-Şeyh Mehmed nâm kimesne meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızı Dergâh-ı âlî -dâme mahfûfen bi’l-me‘âlî- müteferrikalarından Sefer Ağa b. Abdullah nâm kimesne tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında el-Hâc Pervâne Çavuş b. Abdullah ve Yusuf Bey b. Abdullah el-Bevvâbü’s-sultânî şehâdetleri ile şer‘an sâbite ve müte‘ayyine olan Dergâh-ı âlî müteferrikalarından fahrü’l-emâsil ve’l-ekârim câmi‘ü’l-mehâmid ve’l-mekârim Ali Ağa b. Mustafa nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı müzâfâtından Silivri nâhiyesine tâbi‘ Büyükkılıçlar nâm karyede vâki‘ işbu akdin sudûruna değin müvekkilelerim mezbûretân hanımların silk-i mülk-i sahîhlerinde münselik ve münharıt olan ve etrâf-ı erba‘ası tarîk-i âma müntehî olup çiftlik demekle mu‘abber bir tahtânî beyti ve bir çardağı ve sundurma ahırı ve dink ahırı ve samanlığı ve müte‘addid çatma oda ve anbarları muhtevî muhavvatayı müştemil mülk menzillerini cümle-i tevâbi‘ ve levâhıkı ve kâffe-i menâfi‘ ve merâfıkı ile müvekkil-i mûmâ-ileyh Sefer Ağa’ya yirmi bin nakd-i fıddî-i Osmânî râyic fi’l-vakt akçeye bey‘ ve kabz-ı semen ve teslîm-i müsemmen eylediklerinden sonra yine karye-i merkūme kurbunda mevâzi‘-i adîdede vâki‘ işbu tefvîz sudûruna değin müvekkilelerim merkūmetân hanımların taht-ı tasarruflarında olup her biri inde ahâlî ma‘lûmü’l-hudûd ve’l-mikdâr tahmînen cümlesi altmış müd tohum istî‘âb eder çiftlik-i mezbûr ile tasarruf olunan tarlalar lede’l-enâm ve’l-cîrân ma‘lûmü’l-hudûd bir kıt‘a çayırın ve bir kıt‘a bostan yerinin hakk-ı tasarrufları sâhib-i arz ma‘rifetiyle müvekkil-i mûmâ-ileyh Sefer Ağa’ya tefvîz edip ol dahi minvâl-i muharrer üzre tefevvüz ve kabûl ettiklerinden sonra mukābele-i tefvîzde olan altmış bin nakd-i mezbûrü’n-na‘t akçeye alâ sebîli’l-münâsafa müvekkil-i müşârün-ileyh Sefer Ağa [yedinden] bi’t-tamâm ve’l-kemâl ahz ve kabz eylediler ba‘de’l-yevm sâlifü’l-beyân çiftlik-i mahdûd müvekkil-i mûmâ-ileyh Sefer Ağa’nın mülk-i müşterâ-yı sarîhidir ve mârrü’z-zikr çiftlik-i mezbûr ile tasarruf olugelen tarlaların ve çayırın ve bostan yerinin hakk-ı tasarrufları müvekkil-i mersûmundur sâir emsâli tasarrufları gibi keyfe mâ yeşâ ve hasbe mâ yürîd mutasarrıf olsun [43a] dedikde vekîl-i mûmâ-ileyh Mustafa Bey’in bi’l-vekâle cârî olan ikrâr ve takrîrini vekîl-i mersûm Ali Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt olundu. İşbu hurûf ber sebîli’t-temessük ketb ve imlâ olunup yed-i tâlibe def‘ ve vaz‘ olundu lede’l-hâce ibrâz ve ihticâc edine. Hurrire fi’l-yevmi’s-sâmin ve’l-ışrîn min Cumâdelâhire li sene tis‘a ve ışrîn ve elf. Şuhûdü’l-hâl: Mahmud Çelebi b. Hüseyin el-Cündî Sinan Bey b. ( ), Mehmed Bey b. Ahmed el-Kâtib, İbrahim Bey b. Abdullah el-Cündî Rıdvan Bey b. Abdullah el-Bevvâbü’s-sultânî, Ahmed Kethüdâ b. Abdullah el-Cündî Ahmed b. İbrahim el-Cündî Mehmed Bey b. Abdullah el-Bevvâbü’s-sultânî, Mustafa b. Mehmed el-Muhzır, Perviz b. Abdullah el-Muhzır, Ali b. Abdullah el-Muhzır, Yusuf b. Abdullah el-Muhzır, Yakub b. Kurd ve gayruhüm.