Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 255 Hüküm no: 288 Orijinal metin no: [43a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Aynî’nin harap menzilinin varislerince Ayşe bt. Hüseyin’e satılması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Yâvedûd mahallesi sâkinlerinden olup bundan akdem vefât eden Ali b. Aynî nâm kimesnenin verâseti, sulbiye sagīre kızı Sabiha nâm sagīreye ve zevce-i metrûkesi Kerime bt. İbrahim nâm hâtuna münhasıra oldukdan sonra mezbûre Kerime kendi tarafından asâleten ve sagīre-i mezbûre Sabiha tarafından vesâyeten meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Ayşe bt. Hüseyin nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ müteveffâ-yı mezbûrun terekesinden olup bi hasebi’l-irsi’ş-şer‘î ikimize intikāl eden iki tarafdan vakıf bostana ve bir tarafdan es-Seyyid Abdi b. es-Seyyid Mustafa zâviyesi’ne ve bir tarafdan tarîk-i âma müntehî ve mahdûd olup bir beyt-i süflîyi ve bir beyt-i ulvîyi ve gurfeyi ve cüneyneyi ve sofayı ve kenîfi ve muhavvatayı müştemil olan mülk menzil tûl-i zamân ile harâbe müşrif olup ve sagīre-i mezbûrenin dahi nafakaya ihtiyâcı olup ve bin dahi menzil-i mezbûrun ta‘mîr ve termîmine adem-i kudretim olmağın her vechile menzil-i mezbûr bey‘ olunması enfa‘ olduğu ecilden sâlifü’z-zikr menzili cümle-i tevâbi‘ ve levâhıkı ile mezbûre Ayşe Hâtun’a yedi bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûd merkūme Ayşe’nin mülk-i müşterâ-yı sarîhidir keyfe mâ yeşâ ve yahtâr mutasarrıfe olsun dedikde mukırra-i mezbûrenin minvâl-i muharrer üzre cârî olan ikrâr ve takrîrin el-mukarru lehü’l-mezbûre Ayşe vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire li târihi’l-mezbûr. Şuhûdü’l-hâl: Mehmed Efendi b. Hızır el-Kadı, Mehmed b. İbrahim, Pîrî Bey b. Abdullah, Bâkī Beşe b. Receb er-Râcil, Hüseyin b. Hasan el-Muhtesib, Mustafa b. Mehmed, Ali b. Abdullah, Perviz b. Abdullah, Yakub b. Kurd ve gayruhüm mine’l-hâzırîn.