Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 256 Hüküm no: 289 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemihan Hâtun bt. İbrahim Çavuş’un tarlasına müdahale edilmemesi Cerâ’l-emr ve fermân hasbe mâ cerâ fîh Nemekahû el-fakīr ileyhi sübhânehû Ramazan b. İbrahim el-müvellâ bi Silivri hilâfeten -ufiye anhümâ- Havâss-ı Aliyye tevâbi‘inden kasaba-i Silivri nâhiyesinde vâki‘ Akviran nâm karyede çiftliği olan zahrü’l-muvakkarât İstemihan Hâtun bt. İbrahim Çavuş tarafından husûs-ı âti’l-beyâna vekîl olup hasm-ı şer‘î-i câhid mahzarında Mehmed Çelebi b. Hüdâverdi ve Osman Beşe b. Abdullah şehâdetleri ile vekâleti sâbite olan Murtaza Beşe b. Abdullah nâm kimesne vekâleten mahfil-i kazâda karye-i merkūmede müsellem tâifesinden Emrullah b. Timur ve Ali b. Ahriyan ve Mustafa b. Erbeyi nâm kimesneler mahzarlarında üzerlerine takrîr-i da‘vâ edip mezbûrların toprağı dâhilinde olup karye-i merkūme sınırında vâki‘ Bâkirler yerleri demekle ma‘rûf yerlerde Delicederesi demekle ma‘rûf yerlerde hudûdu beynimizde ma‘lûm tahmînen on iki müd tohum alır tarlalar müvekkile-i merkūme İstemihan Hâtun’un babası İbrahim Çavuş’un elli altmış seneden mütecâviz tasarrufunda olup bin on altı senesinde vâki‘ Rebî‘ulâhire’de bi emrillâhi te‘âlâ fevt oldukda evlâd-ı zükûru kalmayıp kızı olup elverdiğin verip yine karye-i merkūme sınırında Dörderci Hasan Çayırı demekle ma‘rûf bir kıt‘a çayırı tapulayıp çayır için yedine tezkire alıp tarlaların dahi bi hasebi’l-kānûn resm-i tapusun alıp tezkiresin verdik derken târih-i merkūmdan bu âna gelince on iki senedir ki zirâ‘at olunduğu sene müteveccih olan öşr-i şer‘iyyelerin alırlar iken bu sene-i mübârekede müvekkile-i merkūmenin zevci olan İbrahim Subaşı fevt olmak ile mücerred celb ve ahz için tarlalar anın tasarrufundadır evlâd-ı zükûru kalmayıp tapuya müstahık olmuşdur deyû eben an ceddin elli altmış seneden beri tasarruflarında olan tarlalara dahl ve ta‘arruz ederler ve bi’l-cümle suâl olunup cevâbları tahrîr olunup men‘ ve def‘ olunması için Dergâh-ı âlî -dâme mahfûfen bi’l-me‘âlî- çavuşlarından kıdvetü’l-a‘yân Davud Çavuş mübâşeretiyle yedinden buyruldu-yı şerîf ve mürâsele-i münîf vârid olup imtisâlen li’l-emri’l-âlî suâl olundukda mezbûrlar cevâblarında elli altmış seneden beri merhûm-ı mezbûrun tasarrufunda olup târih-i merkūmdan bu âna gelince on iki senedir ki müvekkile-i merkūmenin tasarrufundadır zevcinin alâkası yokdur deyû bi’t-tav‘ ve’r-rızâ mukırlar olmağın mûceb birle mu‘ârazadan men‘ olunup mâ hüve’l-vâki‘ gıbbe’t-taleb ketb olundu. Tahrîren fî evâsıtı şehri Recebi’l-mürecceb li sene semân ve ışrîn ve elf. Şuhûdü’l-hâl: Davud Çavuş b. Abdullah, Mehmed Çavuş b. Nurullah, Mehmed Bey b. Abdullah, Ahmed Bey b. Hüsrev serdâr, Abdullah Efendi b. Abdülganî el-Müderris, Hasan Efendi b. Ali el-Müsta‘id, Mehmed b. Hasan el-Muhzır, Mustafa b. Ali.