Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 182 Hüküm no: 151 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hokas v. Bengi’nin, Avanos v. Aznavur’daki alacağını tahsil ettiği Havâss-ı refî‘a kazâsı müzâfâtından kasaba-i Hasköy’de kiremitçi olup hâlâ ordu-yı hümâyûnda orducu olan Hokas v. Bengi nâm zimmînin oğlu ve tarafından husûs-ı âtîye vekîl olduğu Yani v. Serkis ve Hokar v. Zerker nâm zimmîler şehâdetleri ile şer‘an sâbite olan Harzar nâm Ermeni meclis-i şer‘de Avanos v. Aznavur nâm zimmî muvâcehesinde üzerine da‘vâ ve takrîr-i kelâm edip her bir esedî guruş yüz yirmi akçeye râyic olan akçeden müvekkilim mezbûr Hokas’ın yedinden müşterâ ve makbûz katır ve serhaddî çuka semenlerinden ve cihet-i karz-ı şer‘îden merkūm Avanos zimmetinde otuz altı bin yedi yüz akçe hakkı olmağla mezbûr Avanos bundan akdem deyn-i mezbûrun sekiz bin dört yüz akçesi için bana yetmiş esedî guruş teslîm ben dahi yedinden ahz u kabz edip bâkī zimmetinde kalmışidi suâl olunup alıverilmek matlûbumdur dedikde, gıbbe’s-suâl mezbûr Avanos müvekkil-i mezbûra vech-i meşrûh üzre deynim olan otuz altı bin yedi yüz akçeden müdde‘î-i mezbûrun ahzını i‘tirâf ettiği meblağ-ı mezbûrdan mâ‘adâ müvekkil-i mezbûra deyn-i mezbûrun altı bin akçesi için elli esedî guruş dahi def‘ ve teslîm, ol dahi ahz u kabz etmişidi deyû müdde‘î-i mezbûru kabz da‘vâsında def‘ ile mütâlebe edicek gıbbe’s-suâl ve’l-inkâr müdde‘î-i mezbûrdan def‘-i mezbûru mübeyyine beyyine taleb olundukda mahmiye-i İstanbul’da Unkapanı dâhilinde Arabacılar meydanında sâkin Mıgırdiç v. Yani ve Mercan’da papuçcu olan Marko v. Garabet nâm Ermeniler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Avanos müvekkil-i mezbûra deyn-i mezbûrunun altı bin akçesi için bizim huzûrumuzda elli esedî guruş def‘ ve teslîm ol dahi ahz u kabz etmişidi biz bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mûcebince deyn-i mezbûrdan bâkī yirmi iki bin üç yüz akçeyi müdde‘î-i merkūma edâya merkūm Avanos’a tenbîh olundukdan sonra müdde‘î-i merkūm dahi meclis-i mezbûrda merkūm Avanos muvâcehesinde ikrâr ve takrîr-i kelâm edip merkūm Avanos ânifen edâsına tenbîh olunan meblağ-ı bâkī-i mezbûr yirmi iki bin üç yüz akçe için bana yüz seksen beş buçuk ve bir sülüs esedî guruş def‘ ve teslîm edip ben dahi yedinden ahz u kabz eyledim min ba‘d meblağ-ı mezbûrdan merkūm Avanos zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis [min] Cumâdelûlâ li sene seb‘a ve seb‘în ve elf Şuhûdü’l-hâl: Receb Çavuş b. Mustafa, Abdi Çelebi b. Hüseyin, İbrahim Çelebi b. Hacı Ahmed, Minas v. Yakob, Latof v. Andriyas, Ledros v. Latof, Evarek ve Harad.