Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 181 Hüküm no: 150 Orijinal metin no: [19b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avraham v. İlya’nın, Âişe bt. Mehmed’e sattığı Londrine çuka bahasına karşılık rehin aldığı yakut yüzüğü borcun ödenmesiyle geri verdiği Mayora cemâ‘atinden Avraham v. İlya nâm Yahudi meclis-i şer‘-i hatîr-i lâzımü’t-tevkīrde Mahmiye-i İstanbul’da Hoca Kasım Gönânî mahallesinde sâkine Âişe bt. Mehmed nâm hâtun tarafından husûs-ı câi’z-zikri tasdîka vekîl olup zât-ı mezbûreyi ma‘rifet-i şer‘iyye ile ârifân olan Mehmed b. Ali ve Abdülcelil b. Ahmed nâm kimesneler şehâdetleri ile şer‘an vekâleti sâbite olan babası Mehmed Beşe b. Ali mahzarında ikrâr ve takrîr-i kelâm edip müvekkile-i mezbûre Âişe Hâtun târih-i kitâbdan üç ay mukaddem on altı riyâlî guruşa dört zirâ‘ al Londrine çuka bey‘ ve teslîm edip ol dahi iştirâ ve kabz ve tesellüm ettikden sonra meblağ-ı mezbûr mukābelesinde müvekkile-i mezbûre Âişe Hâtun bir gök yâkut taşlı hâtemini yedime rehin vaz‘ etmeğin mukaddemâ meblağ-ı mezbûr on altı guruşu müvekkile-i merkūmeden da‘vâ ve taleb ettiğimde meblağ-ı mezkûrun on iki guruşunu ikrâr mâ‘adâyı inkâr etmekle beynimizde münâza‘ât-ı kesîre [20a] vakı‘a olmuşidi el-hâletü hâzihî muslihûn tavassut edip müvekkile-i merkūme Âişe Hâtun ile beynimizde on dört riyâlî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr on riyâlî guruşu vekîl-i merkūm Mehmed Beşe yedinden tamâmen ahz u kabz ettiğimden sonra yedime rehin vaz‘ olunan mârrü’z-zikr hâtemi vekîl-i merkūm Mehmed Beşe’ye teslîm ol dahi ahz u kabz edip husûs-ı mezbûra müte‘allika de‘âvâdan müvekkile-i merkūme Âişe Hâtun’un zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel li sene 1077. Şuhûdü’l-hâl: Hüseyin b. Abdullah, Davud Beşe b. Ramazan, el-Hâc İbrahim b. ( ), Mehmed b. Ramazan, Abdi Çelebi b. Hüseyin.