Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 265 Hüküm no: 303 Orijinal metin no: [45b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çavuş b. Faik’in çiftliğini Mahmud b. Mustafa’ya satıp bazı mülklerinin de kullanım hakkını devretmesi Mahmiye-i Kostantıniyye -humiyet ani’l-âfât ve’l-beliyye- mahallâtından Nişâncı-i atîk mahallesi sâkinlerinden fahrü’l-cüyûş İbrahim Çavuş b. Fâik meclis-i şer‘-i şerîf-i lâzımü’t-teşrîfde işbu hâmil-i hâze’l-kitâb Mahmud b. Mustafa tarafından husûs-ı âti’l-beyânı tasdîka vekîl olup vekâleti bimâ hüve nehci’l-mu‘teberi’l-mer‘î şer‘an sâbite olan Mustafa b. Abdullah mahzarında bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı tevâbi‘inden Büyükhalkalı nâm karyede vâki‘ bir tarafdan Mehmed Çelebi b. ( ) mülküne ve bir tarafdan Dimitri v. İstemad mülküne ve iki tarafdan tarîk-i âma müntehî ve mahdûd muhavvata-i dâhiliyye ve hâriciyyeyi hâvî olup muhavvata-i dâhiliyyesi üç süflî beyti [ve] iki ahırı [ve] bir sofayı ve bir su kuyusunu ve bir fırın ve bir kenîf ve eşcâr-ı simâr ve gayr-ı simârı ve iki ıstabl ve muhavvata-i hâriciyyesi eşcâr-ı müsmire ve gayr-ı müsmireyi hâviye bir hadîkayı müştemil olan mülk çiftliğimi bi cümleti’t-tevâbi‘ ve’l-levâhık ve bir çift su sığırı ve iki çift kara sığır öküzünü ve âlât-ı çiftliği bi safkatin vâhidetin müvekkil-i merkūm Mahmud’a otuz üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eylediğimden sonra yine karye-i merkūme sınırı dâhilinde harmanlar kurbunda bir tarafı Halil Usta ve bir tarafı İsmail tarlasına ve iki tarafı tarîk-i âma müntehî ve mahdûd bir kıt‘a tarlanın ve saray altından bir tarafı Mehmed Ağa’nın ve bir tarafı Handan Ağa’nın ve bir tarafı Haydar Usta’nın tarlalarına ve bir tarafı tarîk-i âma müntehî bir kıt‘a tarlanın ve Kozluk kurbunda bir tarafı Haydar Usta’nın ve bir tarafı Süleyman Ağa’nın ve bir tarafı reis-i küttâbın ve bir tarafı ( ) tarlalarına müntehî bir kıt‘a tarlanın ve yine Kozluk altında bir tarafı beyliğe ve bir tarafı Papaoğlu’nun ve bir tarafı ( ) tarlalarına müntehî bir kıt‘a tarlanın ve yine bir tarafı Halil Usta’nın ve bir tarafı Süleyman Ağa’nın ve bir tarafı Sinan Ağa’nın ve bir tarafı Haydar Usta’nın tarlalarına müntehî bir kıt‘a ve yine Zîver tarla[sı] kurbunda bir tarafdan Sinan Ağa’nın ve bir tarafı Süleyman Ağa’nın ve bir tarafı Mehmed Çavuş’un tarlalarına ve bir tarafı tarîk-i âma müntehî bir kıt‘a tarlanın ve yine bir tarafdan beylik çayıra ve bir tarafdan Mehmed Ağa tarlasına ve bir tarafı Benefşe’den ve bir tarafı Alantepe’ye müntehî bir kıt‘a tarlanın ve yine bir kıt‘a Küçükhalkalı kurbunda bir tarafdan Mehmed Ağa tarlasına ve üç tarafı tarîk-i âma müntehî bir kıt‘a tarlanın ve karye-i Papas hudûdunda vâki‘ iki tarafı Solak Mustafa tarlasına ve bir tarafı İbrahim Ağa tarlasına ve bir tarafı tarîk-i âma müntehî bir kıt‘a cem‘an dokuz kıt‘a taht-ı tasarrufumda olup ber vech-i tahmîn cümlesi on müd tohum istî‘âb eder tarlalarımın hakk-ı tasarruflarını sâhib-i arz ma‘rifetiyle müvekkil-i merkūm Mahmud’a tefvîz edip mukābele-i tefvîzde olan sekiz bin nakd-i mezbûrü’n-na‘t akçeyi merkūm yedinden ahz eyledim ba‘de’l-yevm sâlifü’l-beyân çiftlik müvekkil-i merkūm Mahmud’un mülk-i müşterâsıdır ve mârrü’z-zikr tarlaların hakk-ı tasarrufları dahi merkūmundur dedikde vekîl-i mezbûr vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer li târihi’l-mezbûr. Şuhûdü’l-hâl: Mehmed Çelebi b. ( ) el-İmâm, Kurd Çelebi b. ( ), Piyâle Çavuş b. ( ), Ahmed Usta b. ( ), Ahmed Ağa el-Müteferrika, Süleyman b. Abdullah er-Râcil, Osman b. Halil, Mehmed Ağa el-Müteferrika, Mustafa b. Mehmed, Ali b. Abdullah, Perviz b. Abdullah ve gayruhüm mine’l-hâzırîn.