Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 266 Hüküm no: 304 Orijinal metin no: [45b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. İstemad’ın yoncalığını Nikola v. Kosta’ya satması Vilâyet-i Rumeli’nde İnebahtı sancağında Gerbeniş kazâsına tâbi‘ İstenoma nâm karye sâkinlerinden Panayot v. İstemad nâm zimmî meclis-i şer‘-i şerîfde işbu hâmil-i hâze’l-kitâb Nikola v. Kosta nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûre kurbunda vâki‘ bir tarafdan Nikola v. Oslah çayırına ve bir tarafdan Mihal v. Lotina çayırına ve bir tarafdan İstirati v. Nikola çayırına ve bir tarafdan Yorgi v. Nikola çayırına müntehî bir kıt‘a mülk yoncalığımı cümle-i tevâbi‘ ve levâhıkı ile mezbûr Nikola’ya bin iki yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân hudûd ile mahdûd olan yoncalık merkūm Nikola’nın mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr Nikola bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olunup yed-i tâlibe def‘ olundu. Hurrire fi’l-yevmi’s-sâmin min şehri Cumâdelâhire li sene tis‘a ve ışrîn ba‘de’l-elf. Şuhûdü’l-hâl: Yorgo v. Şirvilo, Yani v. Dero, Andriye v. Franko, Mihal v. Pavlo, Şirvilo v. Mihal, Şirvilo v. Kiryazi, Dimo v. Nikola ve gayruhüm mine’l-hâzırîn.