Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 268 Hüküm no: 307 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pavlo v. Kako’nun tarla anlaşmazlığında Pano v. Yorgo ile sulh olması Vilâyet-i Rumeli’nde Yanya kazâsına tâbi‘ Ercistine nâm karye sâkinlerinden Pavlo v. Kako nâm zimmî meclis-i şer‘-i hatîrde işbu hâmil-i hâze’l-kitâb Pano v. Yorgo nâm zimmî mahzarında bi’t-tav‘ ikrâr ve takrîr-i kelâm edip bundan akdem karye-i merkūmede mürd olan li ebeveyn karındaşım Minho nâm zimmînin merkūm Pano beynimizde ma‘lûm gümüş kadehini ahz ve karye-i merkūme sınırı dâhilinde vâki‘ her biri lede’l-ahâlî ma‘lûmü’l-hudûd dört kıt‘a tarlasın tasarruf edip mürd-i mezbûrun verâseti bana münhasıra olmağın ben dahi da‘vâ ve taleb ettiğimde karındaşın mürd-i mezbûra hâl-i hayâtında karz[en] beş bin üç yüz nakd-i fıddî-i Osmânî râyic fi’l-vakt akçe verip meblağ-ı mezbûr mukābelesinde zikr olunan kadehi ve tarlaları bana vermişdir demekle beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynimize muslihûn tavassut edip es-sulhu seyyidü’l-ahkâm fehvâsınca dört yüz nakd-i mezbûrü’n-na‘t akçe üzre akd-i sulh inşâ ettiklerinde ben dahi sulh-i mezbûru kabûl ve bedel-i sulh olan dört yüz akçeyi merkūm Pano yedinden bi’t-tamâm ve’l-kemâl ahz ve kabz edip husûs-ı mezbûra müte‘allik da‘vâdan merkūm Pano’nun zimmetini ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı mezbûra müte‘allik benden bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun ikrârını el-mukarru lehü’l-mezbûr Pano vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin li târihi’l-mezbûr. Şuhûdü’l-hâl: Nikola v. Minho, Kofeni v. Verane, Dimo v. Yani, Nikola v. Prase, Pavlo v. Manol, Kosta v. Doni.