Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 267 Hüküm no: 306 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdullah ile kız kardeşleri Hasnâ ve Fati’nin menzillerini Simo v. Minho’ya satmaları Vilâyet-i Rumeli’nde Premedi kazâsına tâbi‘ Seropi nâm karye sâkinlerinden Hasan Beşe b. Abdullah nâm acemî tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Hüseyin Beşe b. Hasan ve Hasan b. Sinan şehâdetleri ile şer‘an sâbite olan Mehmed b. Abdullah nâm râcil ve li ebeveyn kız karındaşları Hasnâ ve Fati nâm hâtunlar taraflarından husûs-ı mezbûru ikrâra vekîl olup vekâleti kezâlik hasm-ı şer‘î-i câhid mahzarında Kasım b. Yakub ve Mehmed b. Ali şehâdetleri ile şer‘an sâbite olan Ahmed Beşe b. Abdullah nâm râcil meclis-i şer‘-i hatîr-i lâzımü’t-tevkīrde vekâleten her biri işbu hâmil-i hâze’l-kitâb Simo v. Minho nâm zimmî mahzarında takrîr-i kelâm edip karye-i merkūmede vâki‘ iki tarafdan müşterî-i mezbûr mülküne ve iki tarafdan tarîk-i âma müntehî ve mahdûd bir tahtânî beyti ve kileri ve zât-ı eşcâr-ı müsmire ve gayr-ı müsmireyi hâvî cüneyneyi müştemil olup işbu akdin sudûruna değin müvekkilelerimizin ale’l-iştirâk silk-i mülk-i sahîhlerinde münselik olan mülk menzillerini cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Simo’ya üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip ve mebî‘-i mezkûru mahallinde kabza müşterî-i merkūmu taslît eylediler ba‘de’l-yevm sâlifü’l-beyân menzil-i mahdûd merkūm Simo’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dediklerinde mukırrân-ı mezbûrânın bi’l-vekâle cârî olan ikrâr ve takrîrlerini el-mukarru lehü’l-mezbûr Simo vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fî 16 min Receb li târihi’l-mezbûr. Şuhûdü’l-hâl: Hasan Beşe b. Abdullah, Aydın b. Mustafa, Ali b. Mustafa, Mehmed b. Ali, Hüseyin b. Hasan, Sinan b. Mehmed, Ali b. Abdullah, Mustafa b. Mehmed, Yakub b. Kurd ve gayruhüm mine’l-hâzırîn.