Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 270 Hüküm no: 311 Orijinal metin no: [46b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Mehmed Beşe’nin yurt yeri ile tarla tasarruf hakkını Ali b. Abdullah’a satması Zümre-i yeniçeriyândan Mehmed Beşe b. ( ) Râcil meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Ali [b.] Abdullah nâm kimesne mahzarında bi’t-tav‘ ve’r-rızâ ikrâr [ve] takrîr-i kelâm edip Havâss-ı Aliyye kazâsı müzâfâtından Terkos [nâhiyesine] tâbi‘el-Hâc Mihaliç nâm karyede vâki‘ olup cevânib-i erba‘ası tarîk-i âmla mahdûd olan harâbe mülk yurd yerimin nısfını mezbûr Ali’ye bin fıddî akçeye bey‘-i bât ile bey‘ edip kabz-ı semen ve teslîm-i mebî‘ eylediğimden sonra yine karye-i merkūme sınırı dâhilinde vâki‘ bir tarafdan Osman Çavuş tarlasına ve bir tarafdan Durak tarlasına ve bir tarafdan mîrî arza ve bir tarafdan Sâhibe nâm hâtun tarlasına müntehî ve mahdûd olup ortasından yol geçer tahmînen on iki keyl tohum istî‘âb eder mutasarrıf olduğum bir kıt‘a tarlanın hakk-ı tasarrufunu sâhib-i arz ma‘rifetiyle merkūm Ali’ye tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan beş bin akçeyi kabz eyledim ba‘de’l-yevm sâlifü’l-beyân harâbe yurd yerinin nısfı merkūm Ali’nin mülk-i müşterâ-yı sarîhidir ve mârrü’z-zikr tarlanın dahi hakk-ı tasarrufu merkūmundur dedikde gıbbe’t-tasdîk ketb olundu. Hurrire fî’t-târihi’l-mezbûr. Şuhûdü’l-hâl: Ziya Bey b. Hüseyin el-Cündî Mustafa b. Abdullah, Osman b. Durmuş, Durak b. Osman, Ali b. Abdullah, Perviz b. Abdullah, Yusuf b. Abdullah, Sefer b. ( ).