Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 270 Hüküm no: 312 Orijinal metin no: [47a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahşan bt. Hüseyin’in muhâlaa yoluyla boşandığı Hazret-i Ebâ Eyyûb el-Ensârî- radiye anhu Rabbühü’l-Bârî- mahallâtından Kasım Paşa mahallesinde sâkine olan Rahşan bt. Hüseyin nâm hâtun kıbelinden âtiyyü’z-zikr hul‘ ve ibrâ ikrârına vekâleti Mehmed b. Mehmed ve Ali b. Mehmed nâm kimesnelerin şehâdetleri sâbit olan vekîl Ali b. Abdullah nâm kimesne meclis-i şer‘-i şerîf ve mahfil-i dîn-i münîfde hâzır olup müvekkile-i mezbûresinin hâmil-i hâze’l-kitâb Rıdvan b. Abdullah nâm zevci ile muhâla‘a yaptığını ikrâr ve i‘tirâf etti. Mezbûr Rıdvan da nikâhı esnasında ta‘ahhüd ettiği on bin akçe-i Osmânî mehr-i müecceli ve beynlerinde ma‘lûm ve mu‘ayyen nafaka-i iddeti ve zevcesinden aldığı beş bin beş yüz akçe deyni mukābilinde anınla muhâla‘a yaptı. Zevce-i mezbûre bu sûretle yeni bir nikâh yapılmadan ve mehir ödenmeden helâl olmayacak şekilde zevc-i merkūmundan ayrılmış oldu. Sonra her biri cemî‘-i de‘âvî, mutâlebât, eymân ve muhâsamâtdan umûmen, zevciyyetle alâkalı da‘vâdan husûsen yek diğerinin zimmetini ibrâ-i âm ile husûmet ve nizâ‘ı bertaraf edecek şekilde ibrâ etti. Zevc-i mezbûr vâki‘ ikrârı vicâhen ve şifâhen tasdîk etti. Cerâ fî selhi Recebi’l-ferd li târihi’l-mezbûr. Şuhûdü’l-hâl: İbrahim Çelebi b. Veli, Mehmed Çelebi b. Hızır, Osman b. Durmuş, Server b. Abdullah, Mehmed b. İbrahim, Durak b. Osman, Ahmed b. Yusuf, Mehmed Çelebi b. Mustafa, Ali b. Mehmed, Mustafa b. Mehmed ve gayruhüm mine’l-hâzırîn.