Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 117 Hüküm no: 130 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mariyora’nın uhdesinde olan üç sehim dükkân hissesini Haçador’a sattıktan sonra aynı hisselerin şufa hakkı dolayısıyla Karabet’e devredildiği Kartal kasabasında mütemekkin işbu râfi‘ü’l-kitâb Hıristodolos v. Lefter meclis-i şer‘-i hatîr-i lâzimü’t-tevkīrde zikri âtî dükkâna vâzı‘atü’l-yed olan Mariyora bt. Aci Dimitraki Nasrâniye tarafından ber-vech-i âti’l-beyanda vekîli olduğu zât-ı mezbûreyi bi’l-mu‘arrefe ârifân Ligori v. Aci Dimitraki ve İlya v. Lefter zimmîler şehâdetleriyle sâbitü’l-vekâlesi olan zevci Yanaki v. Aci Mihail zimmî muvâcehesinde üzerlerine da‘vâ ve takrîr-i kelâm edüp kasaba-i mezbûrede çarşıda vâki‘ bir tarafı Şişman Yani veresesi dükkânı ve bir tarafı Zanini menzili ve bir tarafı Aci Dimitraki veresesi dükkânı ve bir tarafı tarîk-i âm ile mahdûd fevkānî iki bâb oda ve sofa ve tahtında iki kepenek bakkāl dükkânı ve sofa ve mahzen ve sokak kapısını müştemil mülk dükkânlar yirmi sehim i‘tibârıyla on sehmi benim olup ve altı sehmi evlâd-ı sıgārıyla Vazoyiçe’nin olup ve üç sehmi mersûme Mariyora’nın olup ve bir sehmi Tarandafile Nasrâniyenin evlâd-ı sıgārının olmağla mesfûre Mariyora sihâm-ı mezkûre üzere üç sehmini işbu hâzır bi’l-meclis Haçador v. Ohan zimmîye bey‘-i bâtt ile yetmiş beş guruşa bey‘ edüp kabz-ı semen kılıp teslîm-i mebî‘ etmişdir lâkin dükkân-ı mezkûrda benim on sehim hissem zikri mürûr eden üç sehim hisseye ben şefî‘im hattâ zikr olunan bey‘ u şirâyı istimâ‘ eylediğim hînde bilâ-te’hîr ol meclisde taleb-i şuf‘a eyledim dedikde mesfûr Haçador bey‘ u şirâsından ibâ ve nâdim olup işbu merkūm Hıristodolos zimmînin ber-vech-i muharrer hisse-i mezkûra şefî‘ olduğunu her biri ikrâr ve i‘tirâf edicek müdde‘î-i mezbûra hisse-i mezkûr ba‘de’l-hükm merkūm Hıristodolos zimmî meclis-i ma‘kūd-ı mezkûrda Karabet v. Kirkor zimmî muvâcehesinde ikrâr ve takrîr-i kelâm edüp dükkân-ı mezkûrda olan üç sehim hisseyi şuf‘adan alıp bize yetmiş beş guruşa merkūm Karabet zimmîye bey‘ u teslîm ve temlîk edüp ol dahi ber-vech-i muharrer iştirâ ve tesellüm ve temellük ve kabz u kabûl edüp kabz-ı semen eyledim hisse-i mezkûrda vechen mine’l-vücûh benim alâka ve medhalim kalmadı dedikde kayd şüd. Fî 8 Recebi’l-ferd sene [1]182 Şuhûdü’l-hâl: Voyvoda Ahmed Ağa, Ahmed Efendi, Molla Hüseyin, Bostanî Hasan Beşe, Kara Ahmed Beşe, Nalband Halil Beşe, Nalband İbrahim Ağa, Kayseriyeli Mehmed Ağa, Berber Hüseyin. Bogos v. Bedros, Aci Mikail v. Kasper, Dikici Mikail v. Vartan, Ohan v. Marat, Kestosider v. Haçador?