Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 116 Hüküm no: 129 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panderi Reis’in uhdesinde olan evin yarısını İstoraki’ye diğer yarısını karısı Desponi’ye sattığı Medîne-i Üsküdar’a muzâfe Adalar nâhiyesine tâbi‘ Heybeliadası karyesinde mütemekkin Panderi Reis v. Drako zimmî meclis-i şer‘-i hatîrde mahmiye-i İslambol’da vâki‘ Kiremit mahâllesinde mütemekkin işbu râfi‘ü’r-rakīm İstoraki v. Foti zimmî muvâcehesinde ikrâr ve takrîr-i kelâm edüp akd-i âti’z-zikrin sudûruna değin yedimde mülk ve hakkım olup karye-i mezbûrede vâki‘ bir tarafı Serandi Yorgo zimmî menzili ve mahzeni ve bir tarafı Komyanozoğlu Kostandi menzili ve bir tarafı kilise odası ve bir tarafı tarîk-i âm ile mahdûd tabaka-i ulyâsında bir bâb köşk ve vüstâsında üç bâb oda ve dehliz ve matbâh ve kenîf ve tahtında bir kepenek bakkāl dükkânı ve bir mikdâr avlu ve iki sokak kapısını müştemil mülk menzilin nısfı benim olup ve nısf-ı âharı zevcem Desponi Nasrâniyenin olmağla el-hâletü hâzihi ben menzil-i mezkûrda olan hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūma beş yüz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl edüp semeni olan meblağ-ı mezkûr beş yüz guruşu müşterî-i merkūm yedinden bi’t-tamâm ve’l-kemâl ahz ü kabz eyledim menzil-i mezkûrda olan nısf hisse-i şâyi‘anın gabn ü tağrîrine müte‘allıka âmme-i da‘vâdan müşterî-i merkūm İstoraki zimmînin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim fîmâ-ba‘d menzil-i mahdûd-ı mezkûrda olan nısf hisse-i şâyi‘inde vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup nısf-ı âharı zevcem mesfûrenin olup ve nısf hisse-i şâyi‘i müşterî-i merkūmun mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-ferd li-sene isnâ ve semânîn ve mi’ete ve elf. Şuhûdü’l-hâl: Voyvoda Ahmed Ağa, Ahmed Efendi, Molla Hüseyin, Kayıkçı Hasan Beşe, Hamleci Mehmed Beşe. Aci Yorgaki, Korneş v. Aci Yorgaki, Siranbedi Yorgo, Foti v. Kosta, Berber Molevasilidi, Anesti v. Yorgo, Palmeri v. Anaştaş ve gayruhum. Yine merkūm Panderi Reis menzil-i mezkûrun nısfını zevcesi Despino bt. Dimitraki Nasrâniyeye beş yüz guruşa bey‘ u teslîm ve temlîk edüp hisse-i mezkûrun gabn ü tağrîrine müte‘allıka âmme-i da‘vâdan zimmetini ibrâ ve iskāt eyledim ve kabz-ı semen eyledim dediği hüccetinde kayd şüd aynı kezâlik. Şâhidûnü’s-sâbıkūn Fî-gurreti Recebi’l-ferd sene [1]182