Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 274 Hüküm no: 317 Orijinal metin no: [48a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. İstirati’nin bağ, şarabhane ve samanlığını Manol v. Yorgi’ye satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Büyük Kerasova nâm karye sâkinlerinden Yorgi v. İstirati nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Manol v. Yorgi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ beyne’l-ahâlî ve’l-cîrân ma‘lûmü’l-hudûd iki kıt‘a mülk bağımı ve bir bâb şarabhânemi ve yine bağlara muttasıl beyne’l-ahâlî ve’l-cîrân ma‘lûmü’l-hudûd bir bâb samanlığımı cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Manol’e altı bin beş yüz nakd-i fıddî-i Osmânî râyic fi’l-vakt akçeye bi safkatin vâhidetin bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eyledim ba‘de’l-yevm sâlifü’l-beyân emlâk merkūm Manol’ün mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Manol bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Şuhûdü’l-hâl: Mihal v. Kirici, Rizo v. Yani, Yorgi v. Mihal, Mihal v. Yorgi, İsteryano v. Nikola, Dimitri v. Manol, Dimitri v. İstemad ve gayruhüm mine’l-hâzırîn.