Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 273 Hüküm no: 316 Orijinal metin no: [47b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Abdullah’ın evini Franko v. Lazo’ya satması Vilâyet-i Rumeli’nde İnebahtı sancağında nefs-i Gerbeniş mahallâtından Aya Yani mahallesi sâkinlerinden Ali Bey b. Abdullah nâm cündî meclis-i şer‘de işbu hâmilü’l-kitâb Franko v. Lazo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Niko v. Kaçori mülküne ve bir tarafdan Niko v. Varako mülküne ve bir tarafdan Dimo v. Franko mülküne ve bir tarafdan Minho v. Kalpasi mülküne müntehî bir fevkānî ve bir tahtânî beyti ve zât-ı eşcâr-ı müsmire ve gayr-ı müsmireyi hâvî muhav[vatayı] müştemil olup işbu akdin sudûruna değin silk-i mülk-i sahîhimde münselik ve münharıt olan menzilimi cümle-i tevâbi‘ ve levâhıkı ile merkūm Franko’ya beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Franko’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Franko vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Şa‘bân li târihi’l-mezbûr. Şuhûdü’l-hâl: Osman Bey b. Abdullah el-Cündî Ali Beşe b. Abdullah er-Râcil, Mehmed b. Abdullah, Mustafa b. Mehmed, Ali b. Abdullah, Perviz b. Abdullah ve gayruhüm mine’l-hâzırîn.