Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 275 Hüküm no: 319 Orijinal metin no: [48a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Çokari’nin Palyokasrı köyündeki yurt yerini Danyal v. Yorgi’ye satması Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Palyokasrı nâm karyeden Yorgi v. Çokari nâm zimmî meclis-i şer‘de hâmilü’l-kitâb Danyal v. Yorgi nâm zimmî muvâcehesinde ikrâr ve takrîr-i kelâm edip karye-i merkūmede vâki‘ bir tarafdan Yani v. Parda mülküne ve bir tarafdan Avyaro mülküne ve iki tarafdan tarîk-i âma müntehî mülk yurd yerimi cümle-i tevâbi‘iyle mezbûr Danyal’a bin altı yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip meblağ-ı mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân mülk yurd yeri mezkûrun mülk-i müşterâ-yı sarîhidir keyfe mâ yeşâ mutasarrıf olsun dediği kayd olundu. Hurrire fi’l-yevmi’s-sâdis min Şa‘bâni’l-mu‘azzam li sene 1029. Şuhûdü’l-hâl: Mustafa b. Mehmed, Yakub b. Kurd, Ali b. Abdullah, Perviz b. Abdullah, Yusuf b. Abdullah, Yorgi [v.] İstefanko, Nikola [v.] Borhi, Yorgo [v.] Gobari, Minho [v.] Gobari, Dimo Papas, Yani [v.] Parda, Mezbûr Yorgi zikr olunan yurd yerini mukaddemâ dört karındaşından bin elli akçeye iştirâ edip ba‘dehû bey‘ eylediği hüccetdir nihâyetü’l-emr ol hüccet [kayd] olunmamağla bu mahalde şerh verildi.