Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 276 Hüküm no: 320 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın Sefer Beşe b. Halil’in terekesinden hakkını alması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Takyecibaşı mahallesi sâkinlerinden Mehmed Bey b. Abdullah nâm cündî meclis-i şer‘-i hatîr-i lâzımü’t-tevkīrde yine mahalle-i mezbûre sâkinlerinden olup bundan akdem maktûl olan Sefer Beşe b. Halil nâm râcilin verâseti, zevce-i metrûkesi Ayşe bt. Yusuf nâm hâtuna ve beytülmâle münhasıra olmağla terekesinin selâse-i erbâ‘ına vâzı‘u’l-yed olan yeniçeriler beytülmâl emîni fahrü’l-emâsil ve’l-ekârim Musa Ağa ile Mustafa nâm kimesne cânibinden husûs-ı âti’l-beyâna vekîl olup vekâleti hasm-ı şer‘î-i câhid mahzarında İbrahim Beşe b. Abdullah ve Ahmed b. Mehmed nâm kimesneler şehâdetleri ile şer‘an sâbite olan otuz üçüncü cemâ‘atinden deveciler odabaşısı olan Ali Beşe b. İsa mahzarında takrîr-i da‘vâ edip maktûl-i mezbûr Sefer Beşe zimmetinde karz-ı şer‘îden yirmi bin nakd-i fıddî-i Osmânî râyic fi’l-vakt akçe hakkım vardır vekîl-i mezbûr Ali Beşe’ye suâl olunup bi hasebi’ş-şer‘i’ş-şerîf meblağ-ı mezbûr maktûl-i merkūm Sefer Beşe’nin muhallefâtından tahlîs olunmak matlûbumdur dedikde gıbbe’s-suâl [ve] akībe’l-inkâr, müdde‘î-i mezbûr Ali Bey’den sıdk-ı kelâmını mübeyyine beyyine taleb olundukda udûl-i müslimîn ve sikāt-ı muvahhidînden Hüsam Efendi b. Abdurrahman ve Mehmed Çelebi b. Şaban nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ maktûl-i mezbûr Sefer Beşe zimmetinde deyn-i şer‘îden merkūm Mehmed Bey’in yirmi bin nakd-i mezbûrü’n-na‘t akçe hakkı olduğuna minvâl-i muharrer üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde şehâdetleri ba‘de’t-tezkiyyeti’ş-şer‘iyye hayyiz-i kabûl ve mahall-i irtizâda vâkı‘a oldukdan sonra meblağ-ı mezbûr maktûl-i merkūm Sefer Beşe’nin muhallefâtından hükm olunup mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis min Şa‘bâni’l-mu‘azzam li sene tis‘a ve ışrîn ve elf. Şuhûdü’l-hâl: Ahmed Çelebi b. Hasan, Mehmed Beşe b. Abdülganî er-Râcil, İbrahim Çelebi b. Muhib, Ahmed Çelebi b. Yusuf er-Râcil, Mehmed Çelebi b. Mahmud, Yusuf b. Abdullah, Yakub b. Kurd, Perviz b. Abdullah, Ali b. Abdullah ve gayruhüm mine’l-hâzırîn.