Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 284 Hüküm no: 333 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın ev, tarla ve çayırlarının tasarruf hakkını Kosta v. Yani’ye satması Havâss-ı Aliyye kazâsı müzâfâtından Terkos nâhiyesine tâbi‘ Eşekçi nâm karye sâkinlerinden Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Kosta v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Hristo v. ( ) mülküne ve bir tarafdan Pavlo v. Aleksi tarlasına ve bir tarafdan kiliseye ve bir tarafdan tarîk-i âma müntehî ve mahdûd bir tahtânî beyti ve iki sundurmayı ve bir kıt‘a harman yerini ve bir kıt‘a harâbe yurd yerini ve fırın yerini ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Kosta’ya dört bin nakd-i fıddî akçeye bâtten bey‘ edip kabz-ı semen ve teslîm-i mebî‘ eylediğimden sonra yine karye-i merkūme sınırı dâhilinde vâki‘ her biri lede’l-ahâlî ma‘lûmü’l-hudûd tahmînen on keyl tohum istî‘âb eder mutasarrıf olduğum üç kıt‘a tarlaların ve yine karye-i merkūme kurbunda vâki‘ lede’l-ahâlî ma‘lûmü’l-hudûd altı arabalık bir kıt‘a çayırın hakk-ı tasarrufunu sâhib-i arz ma‘rifetiyle merkūm Kosta’ya tefvîz edip ol dahi tefevvüz ve kabûl eyledikden sonra mukābele-i tefvîzde olan bin beş yüz nakd-i mezbûrü’n-na‘t akçeyi merkūm Kosta yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûd merkūm Kosta’nın mülk-i müşterâ-yı sarîhidir ve mârrü’z-zikr tarlaların ve çayırın dahi hakk-ı tasarrufu merkūmundur dedikde mukırr-ı mezbûrun ikrârını el-mukarru lehü’l-mezbûr Kosta vicâhen tasdîk edicek mâ hüve’l-vâki‘ ketb olundu. Hurrire fî 18 min Şa‘bâni’l-mu‘azzam sene 1029. Şuhûdü’l-hâl: Fahrü’l-küttâb Ali Efendi b. Mehmed, Hüseyin b. Ali, Ali b. Hüseyin, Yusuf b. Nasuh, Mehmed b. Hüseyin, Ali b. Abdullah, Yakub b. Kurd, Perviz b. Abdullah, Mustafa b. Mehmed ve gayruhüm mine’l-hâzırîn.