Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 284 Hüküm no: 332 Orijinal metin no: [50b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terkos nahiyesinden köylülerin kışlak taleplerinin reddi Havâss-ı Aliyye kazâsı müzâfâtından Terkos nâhiyesinden karye ahâlîsinden Aleksi v. ( ) ve Lika v. ( ) ve Yorgi v. ( ) ve Kosta v. ( ) nâm zimmîler meclis-i şer‘-i hatîr-i lâzımü’t-tevkīrde fahrü’l-küttâb Ali Çelebi b. Mehmed mahzarında her biri takrîr-i kelâm edip karye-i merkūme sınırında vâki‘ merhûm ve mağfûrun-leh Ebü’l-feth Sultan Mehmed Hân -aleyhi’r-rahmetü ve’r-rıdvân- hazretleri evkāfı arâzileri olup merhûmân Abdürrahim Efendi ve Ömer Efendi mutasarrıf oldukları kışlak ba‘de vefâtihimâ mahlûl oldukda merkūm Ali Çelebi sâhib-i arzdan on beş bin akçe tapu ile ahz eylemiş, bizim zikr olunan kışlağa küllî ihtiyâcımız vardır deyû mezbûr Ali Çelebi’nin verdiğini biz verip zikr olunan kışlağı almak kānûn-ı pâdişâhîdir dediklerinde merkūm Ali Çelebi cevâbında fi’l-hakīka zikr olunan kışlağı merhûmân-ı mezbûrân Abdürrahim Efendi ve Ömer Efendi mahlûlünden tapu ile alıp resm-i tapu olan on beş bin akçesi sâhib-i arz yedine teslîm eyledim mezbûrların karyelerine muttasıl olmağla âhar kimesne verdiğini verip biz alırız dedikleri hilâf-ı şer‘ olduğuna yedimde şeyhülislâm hazretlerinden fetvâ-yı şerîfe vardır deyû ibrâz-ı fetvâ-yı şerîfe edip nazar olundukda Zeyd-i müteveffâ[nın] müstahık olduğu koyun kışlağını sâhib-i arz Zeyd’in sulbiye kızlarına teklîf ettikde mezbûreler râgıbe olmamağla sâhib-i arz ecânibden Amr’a resm-i tapu ile tefvîz eylese sonra ol kışlağı karyesinde olan karye ahâlîsi yâhud Zeyd’in kızları Amr’ın verdiğini verip kışlağı Amr’dan almağa [51a] kādir olu[r]lar mı deyû suâl olundukda cevâb-ı bâ savâblarında olmazlar deyû buyurup ber mûceb-i fetvâ-yı şerîfe merkūmûn zimmîler mezbûr Ali Çelebi’ye min ba‘d ta‘arruzdan men‘ olunup mâ hüve’l-vâki‘ gıbbe’t-taleb ketb olundu. Hurrire fî 18 min Şa‘bâni’l-mu‘azzam li sene 1029. Şuhûdü’l-hâl: Mehmed Ağa b. Mahmud Kethüdâ-yı Kiler-i âmire, Ebûbekir Bey b. Himmet el-Kilârî, Mehmed b. Abdullah el-Kilârî, Ahmed Bey b. ( ) el-Bevvâbü’s-sultânî, Hüseyin Bey b. Süleyman el-Kilârî, Hasan b. Ahmed, Mustafa b. Mehmed el-Muhzır, Yakub b. Kurd el-Muhzır, Ali b. Abdullah el-Muhzır, Perviz b. Abdullah el-Muhzır, Mehmed Çelebi b. Davud Efendi en-Nâib ve gayruhüm mine’l-hâzırîn.