Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 286 Hüküm no: 335 Orijinal metin no: [51a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manter v. Dimitri’nin miras işleri için kardeşi Yorgi v. Dimitri’ye vekâlet vermesi Mahmiye-i Üsküdar tevâbi‘inden Çengel nâm karye sâkinlerinden Manter v. Dimitri nâm zimmî meclis-i şer‘de işbu hâmilü’l-kitâb li ebeveyn karındaşı Yorgi v. Dimitri nâm zimmî mahzarında ikrâr edip vilâyet-i Rumeli’nde nefs-i kasaba-i Atina mahallâtından Papafarna mahallesinde vâki‘ olup babamız mezbûrdan ve anamız Liyo nâm nasrâniyeden bi hasebi’l-irsi’ş-şer‘î ikimiz[e] intikāl eden bir bâb menzilden ve bir kıt‘a bağdan nısf hisse-i şâyi‘amı bey‘ ve kabz-ı semen ve bana îsâle karındaşım merkūm Yorgi’yi tevkîl-i sahîh-i şer‘î ile tevkîl ve menâbıma nâib nasb ve ta‘yîn eyledim ol dahi vekâlet-i merkūmeyi minvâl-i muharrer üzre kabûl eyledi dedikde mukırr-ı mezbûrun minvâl-i muharrer üzre cârî olan ikrârını el-mukarru lehü’l-mezbûr Yorgi vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Cafer b. Abdullah, Perviz b. Abdullah, Ali b. Abdullah, Yani v. Dimitri, Dimitri v. Yani, Panayoti v. Tedyo, Nikola v. Damaşka ve gayruhüm mine’l-hâzırîn.