Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 286 Hüküm no: 336 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani’nin çocukları Dimo ve Nikola’nın Trapoliçe kazâsındaki bağlarını Nikola v. Senadino’ya sattıkları Vilâyet-i Rumeli’nde Mora sancağında nefs-i kazâ-i Trapoliçe sâkinlerinden Dimo ve Nikola veledey Yani nâm zimmîler meclis-i şer‘-i hatîr-i lâzımü’t-tevkīrde işbu hâmilü’l-kitâb Nikola v. Senadino nâm zimmî muvâcehesinde her biri takrîr-i kelâm edip kazâ-i mezbûr kurbunda vâki‘ bir tarafdan Kiryako v. İstemad bağına ve bir tarafdan Panayot v. ( ) bağına ve bir tarafdan müşterî-i mezbûr bağına ve bir tarafdan tarîk-i âma müntehî tahmînen sekiz dönüm bir kıt‘a mülk bağdan altı dönüm bağımı ve içinde bir su kuyusunu, mezbûr Nikola’ya dokuz bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân hudûd ile mahdûd olan sekiz dönüm bir kıt‘a mülk bağdan içinde bir su kuyusu ile altı dönümü mezbûr Nikola’nın mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dediklerinde mukırrân-ı mezbûrânın vech-i mübeyyen üzre cârî olan ikrâr ve takrîrlerini el-mukarru lehü’l-mezbûr Nikola bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâdî ve’l-ışrîn min Şa‘bâni’l-mu‘azzam li sene 1029. Şuhûdü’l-hâl: Mustafa b. Mehmed el-Muhzır, Ali b. Abdullah el-Muhzır, Yakub b. Kurd el-Muhzır, Dimo v. Todori, Yorgo v. Nika, İlya v. Anbari, Yani v. Yorgi, Yani v. İstemad, Anagonişti [v.] Todori, Todori Çavuş, Dimitri v. Nikola ve gayruhüm mine’l-hâzırîn.