Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 290 Hüküm no: 342 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Ergiri’nin ev, çayır ve tarlalarını Pervâne Bey b. Abdullah’a satması Havâss-ı Aliyye kazâsı müzâfâtından Terkos nâhiyesi tevâbi‘inden Arnavud Filyozu nâm karye sâkinlerinden Yorgi v. Ergiri nâm zimmî meclis-i şer‘de hâmilü’l-kitâb Pervâne Bey b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Ömer Ağa b. Abdullah mülküne ve bir tarafdan müşterî-i mezbûr mülküne ve bir tarafdan İbrahim nâm kimesne mülküne ve bir tarafdan tarîk-i âma müntehî ve mahdûd olup iki tahtânî ve iki fevkānî beyti ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilimi ve menzil-i mezbûra muttasıl ve mülâsık bir kıt‘a mülk çayırımı cümle-i tevâbi‘ ve levâhıkı ile bi safkatin vâhidetin mezbûr Pervâne Bey’e iki bin sekiz yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen ve teslîm-i mebî‘ eylediğimden sonra yine karye-i merkūmede vâki‘ taht-ı tasarrufumda olan üç kıt‘a tarlaların hakk-ı tasarrufunu sâhib-i arz ma‘rifetiyle mezbûr Pervâne Bey’e tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan iki yüz nakd-i mezbûrü’n-na‘t akçeyi mezbûr Pervâne Bey yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler mezbûr Pervâne Bey’in mülk-i müşterâ-yı sarîhidir ve mârrü’z-zikr üç kıt‘a tarlaların dahi hakk-ı tasarrufu mersûmundur sâir emsâli tasarrufu gibi keyfe mâ yeşâ ve haysü mâ yürîd mutasarrıf olsun dedikde mukırr-ı mezbûru ikrâr-ı meşrûhunda el-mukarru lehü’l-mezbûr Pervâne Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî 23 min Şa‘bâni’l-mu‘azzam li sene 1029. Şuhûdü’l-hâl: Ömer Ağa b. Abdullah ez-Zevvâku’s-sultânî, İbrahim el-Korucu, Mustafa b. Mehmed el-Muhzır, Ali b. Abdullah el-Muhzır, Perviz b. Abdullah el-Muhzır, İstemad v. ( ), Yani [v.] İstefan, Dirane [v.] Yorgi ve gayruhüm mine’l-hâzırîn.